ھاران : سی ٹی ڈی ءَ نور مسکانزئی کُشکار ءِ دزگیری ءِ ٹاہ جتگ

گوستگیں روچاں ھاران ءَ کُشگ بیتگیں گوستگیں چیف جسٹس نور محمد مسکانزئی کُشکار کاؤنٹر ٹیرزام ڈیپارٹمنٹ ( سی ٹی ڈی ) ءَ دزگیر کنگ ءِ ٹاہ جتگ-

سی ٹی ڈی رِد ءَ دزگیر کنگ بیتگیں مرد پجّار شفقت یلانزئی پنّام دلاور ءِ نام ءَ چہ بیتگ وھدے کہ ورناہ گوستگیں روچاں زورانسری آوار جنی نشانگ کنگ بیتگ-

سی ٹی ڈی رِد ءَ دزگیریں مرد ءِ سیادی چہ آجوئی لوٹوکیں سلاہ بندیں گل ءَ اِنت کہ گوستگیں چیف جسٹس بلوچستان جسٹس نور احمد مسکانزئی کُشک ءَ اَبید دگہ کاراں ھوار بیتگ-

س ٹی ڈی ءَ ٹاہ جتگ کہ دزگیریں مرد ءِ گور ءَ چہ مزنیں کچے ءَ سلاہ گولہ دزکپتگ اَنت-

دومی نیمگ ءَ کھول ءَ سی ڈی ٹی ءِ ٹاہ وتگڑ کتگ ءُ گْوشتگ کہ اے ایوک سرکاری پروپیگنڈہ اَنت کہ تھنا سرکاری نکش کدم ءِ سرجم کنگ ھاتر ءَ سرجمیں بھتام ءَ شفقت یلانزئی سر ءَ دیگ ءَ اَنت-

زانگ بہ بیت اے ورناہ ءَ ھوار چار مردم گوستگیں روچاں چہ ھاران ءَ پاکستانی چیریں ادارھاں زورانسری آوار جتگ ءُ بیگواہ کتگ –

بیگواہ بیتگیں ورناھانی تہ ءَ جابر یلانزئی ء پزیر احمد ،نجیب اللہ یلانزئی ء محمد حسین ءُ شفقت یلانزئی ء عبدالرحیم ھوار اِت اَنت-

کھول گوشگ رِد ءَ اشانی تہ ءَ نجیب ءُ جابر پوج ءَ پد ءَ یل کتگ اَنت وھدے کہ شفقت ءُ جابر انگت پوج ءَ گون اَنت-

زانگ بہ بیت کہ بلوچستان ءَ سی ٹی ڈی بیڑ ءَ راجدوستیں پارٹی ءُ انسانی ھکانی گل پیسر ءَ چہ شکی گوشتگ اَنت ئے- راجدوست پارٹی گوشگ رِد ےَ سی ٹی ڈی ھم پاکستانی چیریں ادارھانی وڑ ءَ مردماں بے کانودی دزگیری ءَ ھوار کُشگ ءَ ھم ھوار اِنت-

سی ٹی ڈی اشی ءَ ساری ھم بلوچستان ءَ زورانسری آوار جنی ءِ نشانگ بیتگیں مردماں دروگیں میڑاں کُشگ ءَ اِنت- گوستگیں روچاں کاونٹر ٹیررازم ڈیپارٹمنٹ ( سی ٹی ڈی ) یک بیڑے وتگڑ بیتگ کہ اود ءَ پیسر ءَ چہ چار مردم نوشکی ءَ دروگیں میڑاں کُشگ بیتگ اَنت-