کولواہ ءَ پاکستانی پوج ءِ کاروان ءِ سر ءَ اُرش، اُرش ءِ زمہ واری بی ایل اے ءَ منّ اِتگ

سربوتگیں ھالانی رِد ءَ گوستگیں روچ ءَ ناشناسیں سلاہ بندیں مردماں بلوچستان ءِ دمگ کولواہ ءَ پاکستانی پوج ءِ کاروان ءِ سر ءَ اُرش کتگ –

اُرش کولواہ ءِ ھند بَل ءَ پوج گاڑیانی کاروان ءِ سر ءَ کنگ بوتگ، کہ سلاہ بندیں مردماں پیسر ءَ دگ بستگ ءُ پوج ءِ آیگ ءَ گوں آھانی سر ءَ اُرش کتگ چریشی ءَ پاکستانی پوج ءَ جانی ءُ مالی تاوان ءِ دیمپانی بوتگ وھدیکہ سلاہ بندیں مردم چہ جنگجاہ ءَ در آیگ ءُ روگ ءَ سوبمند بوتگ انت –

دومی نیمگ ءَ بلوچ آجوئی لوٹوکیں سلاہ بندیں گل بلوچ لبریشن آرمی ءِ جارکش جئیند بلوچ ءَ رسانکدراں وتی شنگ کرتگیں درشان ءِ تہ ءَ اے اُرش ءِ زمہ واری منّ اِتگ –

جارکش ءَ گوشتگ کہ بلوچ لبریشن آرمی ءِ سرمچاراں گوستگیں روچ ءِ سھب ءِ ادار نُھ ءَ کیچ ءِ دمگ کولواہ بَل ءِ ھند ءَ پاکستانی پوج ءِ گاڑیانی کاروان ءِ سر ءَ اُرش کتگ ءُ دژمن پوج ءِ چار کارمند کشتگ انت –

آئی ءَ گوشتگ کہ سرمچاراں پیسر ءَ سنگر بستگ ءُ زورگیریں پوج ءِ گاڑیانی کاروان ءِ سر ءَ راکٹ ءُ وتکاریں سلاھاں گوں اُرش کتگ – چریشی ءَ دژمن پوج ءِ چار کارمند ھما دمان ءَ مرتگ ءُ بازینے زدگ بوتگ انت وھدیکہ یک گاڑی ءَ سک باز تاوان رستگ –

جارکش ءَ وتی درشان ءِ گڈسر ءَ گوشتگ کہ بلوچ لبریشن آرمی اے اُرش ءِ زمّہ واری ءَ منّیت ءُ کول کنت دژمن پوج ءِ سرجمی ءَ درآیگ ءَ تاں مئے اُرش چدوگیشتر ترندی ءَ گوں برجاہ مان انت –