کیچ: مکران میڈیکل کالج ءِ چیردستی ءَ شومک ءُ تھلیسیما نادراھیانی درگت ءَ مراگش

کیچ ءِ بنجاھی شھر تربت ءَ مکران میڈیکل کالج ءِ چیردستی ءَ سینہ شومک، پُپانی شومک ءُ تھلیسیمیا نادراھیانی درگت ءَ گرلز ڈگری کالج تربت ءَ سرپدی دیگ ءِ مراگش ءِ برجم دارگ بوتگ –

مراگش ءَ ڈاکٹر روبینہ امجد، ڈاکٹر وقار تاج، ڈاکٹر ساجد نور محمد ءُ ایم ایس ٹیچنگ نادراھجاہ تربت ءِ ڈاکٹر طارق سخی ءَ وتی ھیال درشان اتگ انت ءُ اے نادراھیانی درگت ءَ سرپدی داتگ –

مراگش ءَ مکران میڈیکل کالج پرنسپل ڈاکٹر افضل خالق، وائس پرنسپل ڈاکٹر وحید بلیدی، گرلز کالج ءِ پرنسپل میڈم گل خالد ءَ ابید مزنیں کچے ءَ نودربر ءُ دگہ زالبولاں بھر زرتگ –

مراگش ءِ ترانکاراں اے نادراھیانی اولسر ءَ گرگ ءِ نشانی ءُ آھانی الاج ءِ درگت ءَ ھم گوشتگ – آھانی گوشگ ات کہ اے وھدی سرجمیں دنیا ءَ سینہ ءِ شومک ءِ کساس دوازدہ ملین نادراہ ھست انت ءُ آھانی تہ ءَ ھر سال شش لک ءُ سِی ھزار نادراہ بیران بنت انت – پاکستان ءِ تہ ءَ ھر سال سِی ءَ بگر تاں ھشتاد ھزار مردم اے نادراھی ءِ آماچ بنت ءُ آھانی تہ ءَ چِل ھزار مرگ ءِ آماچ بنت –

آھانی گوشگ ات کہ پاکستان ءِ تہ ءَ ھر ھمک نُھ جنینانی تہ ءَ یک جنین ءِ سینہ ءِ شومک نادراھی ءِ آماچ بیت اِنت اے نادراھی گیشتر پنجاہ سالی برز جنیناں گپت پمے ھاتر ءَ اژدری انت کہ جنین وتی چیک اپ ءَ بہ کنائین انت بلے مئے گور ءَ بدبھتی ءَ جنین پہ چیک اپ ءَ لج کن انت، زالبولانی ھاتر ءَ بریسٹ فیڈنگ المی انت ءُ چریشی ءَ شومک گرگ کم کنگ بیت اِنت –

آھانی گوشگ ات کہ جان یا سینہ ءِ بدلی آیگ ءِ سوب ءَ ھما دمان ءَ ڈاکٹر ءِ گور ءَ رؤگی انت- زالبولانی تہ ءَ سینہ ءِ شومک گیشتر انت – ھمک روچ پاکستان ءِ تہ ءَ یکسد ءُ نُھ زالبول شومک ءِ نادراھی ءَ بیران بیت اِنت –

ڈاکٹر وقار تاج کہ وت جگر ءِ نادراھی ءِ ڈاکٹرے آئی ءِ گوشگ ات کہ جگر انسان ءِ جان ءِ اژدری ایں بھرے کہ بید آئی ءَ زندگ بوگ نہ بیت اِنت ءُ آئی گرانی 1.4 گرام انت، جگر شومک ءِ نادراھی ءِ پنچمی نمبر انت وھدیکہ چریشی ءَ بیرانی سیمی نمبر انت – ھمک سال ھشت لک مردم چریشی ءَ بیران بنت –

آئی ءِ گوشگ ات کہ جگر ءِ نزوری ءَ شومک ءِ نادراھی گپت کنت، ہیپاٹائٹس بی ءُ سی جگر ءِ شومک ءِ مستریں سوب انت وھدیکہ سیمی الکوحل ءُ چارمی زنڈ بوگ ءُ ورزش نہ کنگ ھم ھوار انت، اے نادراھی بندات ءَ زاھری نہ دنت پمے ھاتر ءَ ھترناک انت –

آئی ءِ گوشگ ات کہ سرجمیں جھان ءَ جگر ءِ شومک نادراھانی کچ یک کروڈیے ءَ گیش انت، اے یک جینیاتی نادراھی یے کہ سد ءِ سد درسد آئی ءِ ھلاس بوت نہ کنت – اے جاندراھی ءَ پہ دلگوش نہ دیگ ءَ سوب ءَ گپت –

مکران میڈیکل کالج ءِ نودربر ڈاکٹر ساجد انور ءَ تھلیسیمیا درگت ءَ سرپدی داتگ –