جنگی بندیگانی مٹ ءُ بدل ءِ ھاتر ءَ زورگیریں پاکستانی پوج ءَ ھپتگے ءِ وھد دئیں – بی ایل اے

بلوچ سلاہ بندیں گل بلوچ لبریشن آرمی ءِ جارکش جیئند بلوچ ءَ وتی آفیشیل ترامجاہ ءَ شنگ کرتگیں درشان ءِ تہءَ گوشتگ کہ سینئر کمانڈ کونسل ءَ ھمے پیسلہ کرتگ کہ زورگریں پاکستانی پوج ءِ جنگی بندیگانی مٹ ءُ بدل کنگ ءَ دگہ یک ھپتگے ءِ مھلت دیگ بیت انت، چریشی ءَ پد جنگی بندیگ جونیئر کمیشنڈ آپیسر کلیم اللہ ءُ ملٹری انٹلجنس ایجنٹ محمد فیصل ءَ بلوچ راجی آمیدگس ءِ نیمگ ءَ داتگیں سزا ءِ سر ءَ زوت کار کنگ بیت –

جارکش ءَ گوشتگ کہ زورگیریں پاکستانی پوج جنگی بندیگانی مٹ کنگ ءَ انگت ءَ مئے کرتگیں شرت ءِ پیلو کنگ ءَ بے سوب بوتگ – بلوچ لبریشن آرمی ءَ وتی پنچ اکتوبر دوھزار بیست ءُ دو ءِ شنگ کرتگیں درشان ءَ اے گپ تچک کرتگ کہ اگاں پاکستانی پوج ءَ پہ جنگی بندیگانی یل کنگ ءَ ھر وڈیں زوراکی یے کرت گڈا بی ایل اے ھمے ھک ءَ داریت کہ پہ وتی پھریزگ ءَ جنگی بندیگانی مٹ کنگ ءِ گپ ءَ ھلاس بہ کنت ءُ بندیگانی سزا دیگ ءِ سر ءَ گامگیج بہ زوریت-

آئی ءَ گوشتگ کہ گوستگیں سے ھپتگانی تہ ءَ جنگی بندیگانی مٹ کنگ ءَ زورگریں پوج ءِ نیمگ ءَ شنگ بیتگیں مسام ءَ یک نیمگے ءَ پوج ءِ روشتانی تہ ءَ سستی گندگ بیگ ءَ اِنت ءُ دومی نیمگ ءَ مدام ھمے جھد ءَ کنگ ءَ اِنت کہ کجام وڑ ءَ مئے اوتاگاں سر بہ بیت انت ، مارا لاچار کنگ ءَ اِنت کہ بی ایل اے ءِ وتی کر ءِ جنگی بندیگاں کلیم اللہ ءُ محمد فیصل کشگ بہ بنت-

جارکش جیئند بلوچ ءَ دیمتر ءَ گوشتگ کہ بلوچ لبریشن آرمی ءَ بیست ءُ پنچ ستمبر دوھزار بیست ءُ دو ءَ چیریں ھالے ءِ رد ءَ پاکستانی پوج ءِ دو کارمند چہ ھرنائی ءِ دمگ زردآلو ءَ دزگیر کرتگ اَنت – چہ ایشی ءَ پد بی ایل اے ءِ سینئر کمانڈ کونسل ءَ پنچ اکتوبر دوھزار بیست ءُ دو ءَ ھمے گوشتگ کہ بی ایل اے ءَ میان استمانی جنگی رھبند ءُ میان استمان رھبند ءِ پاسداری کنان ءَ پاکستانی پوج جنگی بندیگانی مَٹ کنگ ءِ مھلت داتگ –

جارکش ءَ گوشتگ کہ زورگریں پاکستانی پوج ءِ گون ءَ پیش کرتگیں مسام ءَ ھمے گندگ بیتگ کہ پاکستانی پوج وتی دزگیر کرتگیں کارمندانی پہ سلامتی یل کنگ ءَ نہ لوٹ ایت بلکیں زورگیریں پوج چہ ھمے داتگیں مھلت ءَ پائدگ چست کنگ لوٹیت ءُ بلوچ سرمچارانی بگیری ءَ پہ زوراکی کنگ ءَ یک ٹوھیں شوربندی یے ٹھینگ ءَ اِنت پہ ھمے اوست ءَ زورگیریں پوج ءِ لیفٹینٹ جنرل آصپ گپور ھمے ھنداں ترّ ءُ گرد ھم کرتگ-

وتی درشان ءِ گڈسر ءَ جارکش ءَ گوشتگ کہ ھمے کارپدانی گندگ ءَ پد بی ایل اے ءِ سینئر کمانڈ کونسل ءَ ھمے سْوَڑگ کرتگ کہ پاکستانی پوج ءَ گُڈی ءَ دگہ یک ھپتگے ءَ مھلت دے ایں، اے مھلت ءِ سرجم بیگ ءَ اگاں پاکستانی پقج ءِ نیمگ ءَ تچک ءُ شریں گامگیجے گندگ نہ بوت گڑا چار نومبر دوھزار بیست ءُ دو ءَ بندیگیں کلیم اللہ ءُ محمد فیصل ءِ سزا ءِ سر ءَ گامگیج زورگ بیت اِنت –