روکپتی بلوچستان ءَ زاھدان یونیورسٹی آف میڈیکل سائنسز ءَ آوار جنگ بیتگیں نودربرانی کچ دوازدہ ءَ سر بیتگ اَنت

دگہ پنچ نودربرانی دزگیری ءَ پد آوار جنگ بیتگیں نودربرانی کچ دوازدہ ءَ سر بیتگ اَنت-

گوستگیں روچ ءَ زاھدان یونیورسٹی آف میڈیکل سائنسز ءِ دیم ءَ زھرشانی کنوکیں نودربرانی سر ءَ پولیس ءُ دگہ ادارھاں بیڑ برتگ ءُ دگہ پنچ کس آوار جتگ ءُ برتگ اَنت-

اے زھرشانی گوستگیں روچاں روکپتی بلوچستان ءَ گیش کپتگیں آوار جنیانی پژدر ءَ بیتگ ءُ چریشی ءَ چہ اے چیزوکے روچانی توک ءَ زاھدان یونیورسٹی آف میڈیکل سائنسز ءِ دوازدہ نودربر آوار جنگ بیتگ اَنت ءُ اشانی توک ءَ جنکین نودربر ھم ھوار اَنت-

اے پنچیں نودربرانی پجار کردستان ءَ سیادی داروکیں ششمی سمسٹر ءِ نودربر مھمد مبین امین بیگی، فزیوتھراپسٹ ءِ نوادربر آرین رفعت جھمنند زاھدان، ششمی سمیسٹر ءِ فزیوتھراپسٹ ءِ نودربر احمد ھزانہ دار، فائنل سمسٹر میڈیکل ءِ نودربر مھمد فرزی جھمنند روکپتی اذدربائیجان ءُ زاھدان ءِ جھمنند بھرام ءِ ناماں زانگ بیتگ اَنت-

روکپتی بلوچستان ءَ سی ستمبر ءَ بنا بیتگیں زھرشانیاں پد داں انگت ءَ باز مردم گرگ ءُ برگ بیتگ اَنت کہ اشانی ھجگیں جنک ھم ھوار اَنت-

گوستگیں روچاں زاھدان یونیورسٹی ءِ میڈیکل سائنسز ءِ نودربر نادر آسکانی، مریم ھاشمزئی، یاسین نوروزی، مھدء سپاھی، سھیل ملاشاھی ، ھاپز سینا دھواری، سھیل اکبری، جعفر زومکزئی ءِ ناماں زانگ بیتگ ات اَنت-

چاگردی رسانکجاھاں شنگ بیتگیں تامر بنداں گندگ بیت اِنت زاھدان یونیورسٹی ءَ نودربرانی زھرشانی ءُ پد ءَ پولیس ءِ بیڑانی توک ءَ گر ءُ چل ھم گندگ بنت –