ڈھاڈر: پولیس تانہ ءِ سر ءَ اُرش، اُرش ءِ زمّہ واری بی ایل اے ءَ منّ اِتگ

ما پولیس مدامی مکن کتگ کہ آ بلوچ راجی زرمبشت ءِ بگیری ءَ مہ رو انت- جیئند بلوچ

سربوتگیں ھالانی رِد ءَ گوستگیں شپ ءَ ناشناسیں مردماں بولان ءِ دمگ ڈھاڈر ءَ پولیس تانہ ءِ سر ءَ دز بمب اُرش ءِ کتگ – اُرش ءَ پولیس ءَ جانی ءُ مالی تاوان رستگ ءُ ارشکار در آھگ ءُ رؤگ ءَ سوبمند بوتگ انت –

دومی نیمگ ءَ بلوچ لبریشن آرمی ءِ جارکش ءَ رسانکدراں وتی شنگ کرتگیں درشان ءِ تہ ءَ اے اُرش ءِ زمہ واری من اِتگ –

بلوچ لبریشن آرمی ءِ جارکش جیئند بلوچ ءَ وتی درشان ءِ تہ ءَ گوشتگ کہ مئے سرمچاراں گوستگیں شپ ءَ بولان ءِ دمگ ڈھاڈر ءَ پولیس تانہ ءِ سر ءَ دزبمب اُرش ءِ کُتگ، اُرش ءِ آسر ءَ یک پولیس کارمند ءِ مُرتگ وھدیکہ تانہ ءَ سک باز تاوان رستگ –

جارکش ءَ گوشتگ کہ بلوچ جھد کاراں پولیس تانہ ءِ سر ءَ ھمے سوب ءَ اُرش کتگ کہ پولیس پاکستانی پوج ءِ کمکار انت – ما پولیس مدامی مکن کتگ کہ آ بلوچ راجی زرمبشت ءِ بگیری ءَ مہ رو انت اگاں ناں گڈا آھانی سر ءَ ترندتریں اُرش کنگ بیت اِنت –

جارکش ءَ گڈسر ءَ وتی درشان ءِ تہ ءَ گوشتگ کہ اے اُرش ءِ زمہ واری ءَ بلوچ لبریشن آرمی منّیت ءُ وتی مکسدانی سوبین بوگ ءَ تاں زورگیریں پوج ءُ آئی کمکارانی سر ءَ مئے اُرش ھمے داب ءَ برجاہ مان انت –