کتاب: The Broken Wings | پرشتگیں بانزُل
چمشانکار: شھباز گنی
دی بلوچستان پوسٹ
“دی بروکن وِنگز” بِزاں پرشتگیں بانزُل یک کسانیں گِدارے پرشتگیں بانزُل ھلیل جِبران ءَ نِبیس اِتگ،کہ آ دنیا ءِ تہ ءَ یک شاھکاریں گِدار نبیسے ،ءُ آ نبشکاری ءَ ابید یک جوانیں آرٹسٹ ءُ پلاسپرے، اے گِدار ھلیل جبران ءِ راستیں زندگی ءَ گوں بندوک اِنت، ءُ اے جبران ءِ زندگی ءِ یک پِراہ ءُ شاھگانیں بھرے کہ آئی ءَ پرشتگیں بانزُل گوں وتی سِتک ءُ دِل ءَ پہ وتی مھر ءُ زند ءِ ھمراہ “سلما ” ءِ ھمراھی ءِ سر ءَ نِبشتہ کُتگ،سلما ءَ ھلیل ءَ را زندگ بوگ ءِ سِکین دات ءُ آئی ءَ را بے کِساسیں مھر داتگ۔
بندات ءَ ھلیل یک گریب ءُ بزکاریں مردمے اَت، آ کسانی ءَ گوں لبزانک، آرٹ ءُ پلسپہ ءِ سَک شوک بوتگ۔ یک روچے ھلیل اچ وتی لوگ ءَ گِستا یک راھسرے ءَ گوں یک پیر مردے پجاروکی بوت کہ آ ھلیل ءِ پِت ءِ یک جوْانیں سنگتے اَت، پیر مرد ءَ ھلیل ءَ آئی ءِ لوگ ءَ روگ ءِ سلاہ جَت یک روچے ھلیل چوناھا پہ تَرّ ءُ گرد ءَ آئی ءِ لوگ ءَ شُت، پیر مرد ءِ لوگ ءَ ھلیل ءِ چَماں وش دروشمیں زالے ءَ کَپت ، آ ھمے پیر مرد ءِ چُک اَت ءُ آئی ءِ نام “سلما ” اَت، بِزاں کہ ھلیل ءِ زِند ءِ ھمسپر ءُ یک ءُ تھنائیں مھر اَت، ھلیل ھمے روچ ءَ پد سلما ءِ دیوانگ جوڑ بوت۔ اچ اے روچ ءَ چہ پد ھلیل ھر روچ پیر مرد ءِ لوگ ءَ شُت ءُ سلما ءِ دیدار کُت ءُ وتی دل ءَ را تاھیر بکشات، لھتیں روچ ءَ چہ پد، سلما گوں ھلیل ءَ رازیگ بوت ءُ وتی زِند ءُ جِند ءِ سودا کُت۔
ھلیل ءُ سلما ھر روچ نِشت ءُ دیوان کُت ءُ وتی مھر ءَ گوں ھمراھی اِش کُت۔ ھر روچ وتی دوستی ءِ کِسہ اِش آؤرت ءُ گُشت اِش کہ مئے زندگی نو ھمے وڑ ءُ ڈول ءَ گوز اِیت، آیاں ھمے پیسلہ کُت کہ ما وت ماں وت ءَ سور کن ایں، بَلے ھلیل یک سکیں گریبیں مردے اَت ءُ سلما ءِ سور گوں پادری ءِ برازتک ءَ بوت لھتیں روچ ءَ چہ پَد، سلما ءِ پِت ءَ دنیا بدل کُت۔
سلما ءِ لوگ واجہ سکیں سِلّیں مردکارے اَت ءُ سلما گوں آئی ءَ سک نا وش اَت سلما ءَ ھچ وشی رسگ ءَ نہ اَت ءُ ھمے درمیان ءَ سلما ءُ ھلیل یک چیر اندریں جاھے ءَ نِشت ءُ دیوان کُت، سلما ءِ لوگ واجہ ءَ سلما ءِ سر ءَ وتی نزر انچو ایر کُت بَلے انگت ءَ سلما ءَ آئی ءِ ھچ چارگ نَہ کُت ءُ ھلیل ءَ گوں نشت ءُ دیوان کُت۔
لھتیں ماھانی گوزگ ءَ پَد سلما ءَ را چُکے لاپ ءَ کَپت، سلما گوں اے وڑیں مردے ءَ نندگ ءُ وَپت ءُ واب کنگ ءَ سک گمیگ اَت ءُ لھتیں روچ ءَ چہ پد سلما وتی چک ءِ پیداک بوگ ءِ وھد ءَ وپات بوت، سلما ءِ وپات بوگ ءِ ھال ءَ ھلیل ءِ دِل ءَ یک بے ایمنیں دردے پیداک کُت ءُ ھلیل وتی زندگی ءَ ھر چیز ءَ چہ زِبھر بوت-
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔