سندھ ءَ پیسر ءَ چہ بیگواھیں مردمانی یل کنگ وتی جاہ ءَ گیش مردماں بیگواہ کنگ ءَ اِنت- بی وائی سی

بلوچ یکجھتی کمیٹی ( کراچی ) ءِ جارکش ءَ وتی شنگ کتگیں درشان ءِ تہ ءَ گْوشتگ کہ مئے گپ ءُ رپ سندھ ھکومت گوم ءَ برجاہ بیتگ کہ آیاں ماری پوری ءَ ھوار کراچی ءِ دگہ دمگاں چہ بیگواھیں مردمانی یل کنائینگ ءِ باور کنائینتگ ءُ مارا اے گْوشگ بیتگ ما وتی برجاھیں نندانک ءَ ھلاس بہ کن اِت وتی لوگاں بہ رو اِت آ سرجمیں مردمانی یل کنائینگ ءَ وتی کرد ءَ پیلو کنت بلے پد ءَ ھما وڑ بیت کہ چو مدامی بوگ ءَ اِنت اے گپ تھنا گپاں تاں مھدود بیتگ اَنت ءُ اشانی سر ءَ ھچ وڑیں گامگیج زورگ نہ بیتگ بلکیں ھمے مردمانی نام ما سندھ ھکومت ءَ داتگ اشانی یل کنگ وتی جاہ گوستگیں روچاں دگہ گیش مردم زورانسری آوار جنی ءِ نشانگ کنگ بیتگ اَنت-

جارکش ءَ دیمتر ءَ گْوشتگ کہ چہ لیاری سرگوات ءَ گلشاد ء دلوش 26 ستمبر ءَ وتی لھتے سنگتانی ھمراھی ءَ ملیر ءَ واتر وتی لوگ ءَ آھگ ءَ بیتگ اَنت کہ آ سنگت سراج ھمراھی ءَ سی ٹی ڈی ءَ راہ نیم ءَ اوشتارینتگ زورانسری آوار جتگ- سراج دو روچ ءَ ساری یل کتگ بلے گلشاد درگت ءَ ھچ وڑیں ھال نیست آ کجا اِنت کجام جاور تہ ءَ اِنت- گلشاد یک نودربرے ءُ ما اے گپ ءَ پدر کن ایں اگاں گلشاد ھرچ وڑیں بھتامے ھست آئی ءَ کورٹ ءَ پیش بکن اِت ءُ جرم ءَ پدر بکن اِت، بلے وڑ راہ ءَ اوشتارین زورانسری آوار جنگ اے وت آئین ءُ کانود ءِ بگیری اِنت، ھمے وڑ سعود ناز نامیں ورنایے زی بیگاہ ءِ وھد ءَ چہ وندر ءَ آئی ءِ لوگ مردمانی دیم ءَ زورانسری آوار جتگ ءُ بیگواہ کتگ اَنت نو آ کجا اِنت کس نزانت- زانگ بہ بیت سعود ناز ایف سی سی نودربرے- اگاں گلشاد، سعود ناز ءُ آیانی ھمراھی ءَ دگہ بیگواھیں مردمانی سر ءَ بھتام ھست گڑا آیاں کورٹ ءَ بیار اَنت ءُ آیانی جرم ءَ کورٹ دیم ءَ پدر بکن اَنت ءُ پد ءُ اشی ھما سزا ءَ دے مارا کبول اِنت – بلے اے وڑ بے کانودی زورانسری آوار جنگ ھچ وڑ کبول نہ اِنت-

جارکش ءَ گْوشتگ کہ ما ھکومت سندھ ءَ لوٹ کن ایں کہ آ گلشاد، سعود ناز ءَ ھوار دگہ بیگواھیں مردماں زوت ءَ چہ یل بہ کن اِت اگاں دگہ بیگواھیں مردم یل کنگ نہ بیت اَنت گڑا ما اشی ءِ بگیر ءَ یک مھکمیں زرمبشتے بندات کن ایں ءُ اشی ءِ بگیر ءَ وتی آؤکیں شوربندی ءَ تیار کن ایں زھرشانی ءُ روانکانی جار ءَ جن ایں- ما اُمیت کن ایں کہ ھکومت سندھ جوانیں وڑے ءَ وتی کرد ءَ پیلو کنت-