مھسا امینی ءِ بیرانی ءَ چل روچ سرجم، ایران ءَ نودربرانی زھرشانی

ایران ءِ پولیس ءِ بندیگجاہ ءَ بندیگیں مھسا امینی ءِ مرگ ءَ چل روچ سرجم بیگ ءَ بازیں شھدربرجاھاں ترندیں کریک ڈاؤناں ابید زھرشانی اش کتگ-

ھبر رساں ادارہ اے ایف پی ءِ رد ءَ شھید چمران اھواز یونیورسٹی ءِ نودربراں سَے شمبے ءِ روچ ءَ ھنچیں اوگام جتگ ’ یک نودربرے وتی ساہ ءَ دات کنت بلے کمشرپی ءَ اوپار کت نہ کنت ‘-

زانگ بہ بیت گوستگیں ماہ ءَ مھسا امینی ءِ مرگ ءَ پد زھرشانیانی توک ءَ وانگجاھانی جنک ءُ زالبول درستاں پیش پیش بیتگ اَنت-

بیست ءُ دو سالی ئیں مھسا امینی ءِ سیادی ایران ءِ کردستان ءَ بیتگ کہ آ برکہ ءِ سر ءَ نہ کنگ ءِ پژدر ءَ پولیس ءِ دزگیری ءِ وھد ءَ پد بیران بیتگ – مھسا امینی ھما وھد ءَ گرگ بیتگ ات کہ آ ایران ءِ بنجاھی شھر تھران ءَ وتی برات ءِ گندگ ءَ اتکگ بیتگ –

انسانی ھکانی باسکانی گوشگ اِنت کہ ایران ءَ سیکورٹ ایجنسیاں مھسا امینی ءِ کھول ءِ مردم آئی ءِ چِلاں پرس نہ دارگ ءِ گوشتگ ءُ بیھار داتگ ءُ گوشتگ مردم آئی ءِ ادیرہ ءِ سر ءَ مہ رو اَنت اگاں نا گڑا آیاں وتی زھگ ءِ زندگی ءِ بارو ءَ بازیں پریشانیانی دیمپانی کنگ کپ ایت-

مروچی چار شمبے ءَ مھسا امینی ءِ مرگ ءَ چل سرجم بیتگ ءُ ایران ءِ دودمان ءَ پرس ءِ گڈی روچ دارگ بیت اِنت –

چاگردی رسانکجاھاں لھتے تامربنداں گندگ بیت اِنت تھران ءَ شھید بھشتی یونیورسٹی، خواجہ نصیر طوسی یونیورسٹی ءَ شھید چمران یونیورسٹہ آف اھواز ءَ نودربر زھرشانی کنگ ءَ اَنت-

اشی ءَ پیسر انسانی ھکانی باسکاں دوشمبے ءِ روچ ءَ بھتام جتگ ءُ گوشتگ کہ سکیورٹی پورس ءَ شھید صدر گرلز سکول ءِ نودربر لٹ ءُ کٹانی نشانگ کنگ بیتگ اَنت-

یک چاگردی رسانکدر چینل “1500 تصویر ” ءِ رد ءَ صدر ھائی اسکول ءِ نودربر پٹ ءُ پول کنگ بیتگ ءُ آ لٹ ءُ کٹانی نشانگ کنگ بیتگ اَنت چریشی ءَ چہ یک شانزدہ سالی جنکوے زدگ بیتگ ءُ نادراہ جاہ ءَ برگ بیتگ-

اے وئیل ءَ پد نودربرانی پت ءُ ماتاں اسکول ءَ ڈن زھرشانی کتگ ءُ سکیورٹی پورس ءَ اسکول ءِ کش ءُ گوری لوگانی سر ءَ تیرگواری کتگ-

دومی نیمگ ءَ ایران ءِ وزارت تعلیم ءَ گوشتگ کہ اے اسکول ءَ نودربرانی پت ءُ مات ءُ اسکول ءِ انتزامیہ ءِ میان ءَ جیڑہ بیتگ کہ اسکول انتزامیہ ءَ موبائل پون ءِ کارمرد کنگ ءَ نیلگ اِنت –