بلوچستان: پاکستانی پوج ءِ دست ءَ چار مردم زورانسری آوار جنی پد بیگواہ

سربوتگیں ھالانی رِد ءَ بلوچستان ءِ دمگ ھاران ءُ سبی ءَ دو براتاں ھوار چار مردم پاکستانی پوج ءَ زورانسری آوار جتگ ءُ بیگواہ کتگ – یک مردمے چہ زنداناں یل بوتگ ءُ گِس ءَ سر بوتگ –

بلوچستان ءَ یکرندے پدا پاکستانی پوج ءِ دست ءَ زورانسری آوار جنیانی تہ ءَ گیشی اتکگ –

ھمے ھپتگ ءَ بلوچستان ءِ جتا جتائیں ھند ءُ دمگاں دوازدہ ءَ گیش مردمانی زورانسری آوار جنی ءِ ھال سربوتگ انت، نوکتریں ھالانی رِد ءَ دگہ چار مردم پاکستانی پوج ءَ زورانسری آوار جتگ ءُ بیگواہ کتگ انت –

اھوالکار ءِ رِد ءَ چہ ھاران ءَ پاکستانی پوج ءَ دو برات زورانسری آوار جتگ ءُ بیگواہ کتگ انت – آوار جنگ بوتگیں مردمانی پجار یوسف بادینی ءُ پرویز بادینی ء فیض محمد بادینی ءِ ناماں بوتگ انت –

اھوالکار ءِ رِد ءَ آوار جنگ بوتگیں مردمانی تہ ءَ یوسف بادینی کہ ھاران بازار ءَ چیف چار راہ ءِ نزیک ءَ آئی ءَ دان ءِ دکان ءِ بوتگ گڈا ایف سی والھاں آ گوشتگ کہ بنجل ءَ دان سر بہ کن – آ وتی بچک ءِ ھمراھی ءَ بنجل ءَ شتگ کہ ھمودا پوج ءَ آوار جتگ ءُ آئی ءِ ھمراہ یل داتگ –

اشی ءَ پد پوج ءَ ھاران کلان مولوی مجید مسیت ءِ نزیک ءَ یوسف بادینی ءِ گِس ءَ بیڑ برتگ – گِس پٹ پول کتگ انت ءُ آئی ءِ دومی برات پرویز بادینی ھم آوار جتگ ءُ بیگواہ کتگ –

زانگ بہ بیت ھاران ءَ بیست ءُ چار ادارانی میان ءَ زورانسری آوار جنیبءِ پنچ ھال سربوتگ انت – گوستگیں شپ ءَ پاکستانی پوج ءَ سَے مردم زورانسری آوار جتگ ءُ بیگواہ کتگ انت – آوار جنگ بوتگیں مردمانی تہ ءَ جابر یلانزئی ء پزیر احمد، نجیب اللہ یلانزئی ء محمد حسین ءُ شفقت یلانزئی ء عبدالرحیم ھوار انت –

ھمے وڈ سبی ءَ پاکستانی پوج ءَ دو مردم زورانسری آوار جتگ ءُ بیگواہ کتگ انت کہ آھانی پجار مٹھا خان ء مالو مری، حفیظ ء روزی خان ءِ ناماں چہ بوتگ انت –

اھوالکار ءِ رِد ءَ ھردو شانزدہ اکتوبر ءَ سبی ءِ دمگ کوٹ منڈائی ءَ آوار جنگ ءُ بیگواہ کنگ بوتگ انت کہ ھنگت بیگواہ انت –

دومی نیمگ ءَ چہ کراچی ءَ ھمے ھال آیگ ءَ انت کہ سال دوھزار نوزدہ ءَ ملیر شرافی گوٹھ ءَ پاکستانی پوج ءِ دست ءَ زورانسری آوار جنگ بوتگیں سخی بخش ء بالاچ جاھمنند سردشت کلانچ مروچی چہ کراچی ءَ یل بوتگ –