سی ٹی ڈی ءِ دست ءَ بلوچ چکچینی ءَ بلوچستان اسمبلی ءِ رزا ھوار انت – ماما قدیر بلوچ

بلوچستان ءِ بنجاھی شھر شال ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی بنجل ءَ مروچی چار ھزار ءُ ھپت سد ءُ نود ءُ نھ روچ سرجم بوتگ انت – مروچی بلوچ اسٹوڈنٹس پجار ءِ سرکماش زبیر بلوچ گوں وتی سنگتاں اتکگ ءُ بیگواھیں مردمانی کھول ءِ گوم ءَ دلپدردی درشان اِتگ –

بنجل ءَ اتکگین مردمانی میان ءَ تران کنان ءَ وی بی ایم پی ءِ سرکماش ماما قدیر بلوچ ءَ گوشتگ کہ بلوچ راج جنگ ءِ تہ ءَ انت ءُ نازکیں دور ءَ گوزگ انت – بلوچ ورنایانی آوار جنی ءَ روچ پہ روچ گیشی آیان انت – پنجاپ ءِ نادراھجاھاں بلوچانی ژانگولین جونانی امبار انت کہ بے سیاد وارس کنگ بوتگ انت –

ماما قدیر بلوچ ءِ گوشگ انت سی ٹی ڈی ءَ بلوچستان اسمبلی رزا گون انت کہ بلوچ ءِ چکچینی ءَ بہ کنت کہ اودا گوشگ بوتگ سی ٹی ڈی ءِ کار دیما برگ بہ بنت ءُ آسراتی دیگ بہ بیت –

آئی ءَ گوشتگ کہ اے وھد شخصیت پرست ءُ ھیروازم ءِ نہ انت بلوچ راجداراں یک مشت بوگی انت ریاست ءِ زوراکی دارگی انت – یکے دومی ءَ اوپار نہ کنگ ءُ یکجاہ نہ بوگ بلوچ راج بدبھتی انت – وتی ھستی ءِ رکینگے ھاتر ءَ مارا یکجاہ بوگ ءَ جھد کنگی انت –

ماما قدیر بلوچ ءَ گوشتگ کہ مروچی بلوچستان ءُ کراچی ءَ ھم بلوچ پھریز نہ انت گوستگیں ماہ ءِ بیست ءُ شش رمس ءَ چہ کراچی ءَ دو ورنا چیریں ادارھانی کارمنداں آوار جتگ ءُ برتگ انت کہ آھانی کھولاں آوار جنی ءِ ھبر راست کتگ انت آھانی پجار گلشاد ء دلوش ءُ سراج اصغر ءِ ناماں چہ بوتگ انت –

ماما قدیر بلوچ ءِ گوشگ ات کہ چہ کراچی ءَ زورانسری آوار جنگ بوتگیں ھردو نودربر انت اگاں آھاں جرمے کتگ گڈا آمیدگس ءَ آرگ بہ بنت –