شال: پاکستان اکادمی ادبیات اسلام آباد ءِ سرکماش ءِ ماں بلوچی اکیڈمی ءَ ترءُ تاب

پاکستان اکادمی ادبیات اسلام آباد ءِ سرکماش ڈاکٹر یوسف خُشک ءَ بلوچستان ءِ بنجاھی شھر شال ءَ بلوچی اکیڈمی ءِ ترّو تاب کتگ ءُ گوں اگدہ دار ءُ باسکاں گپ ءُ تران کتگ- اے دیوان ءَ پشتو اکیڈمی، براھوئی اکیڈمی، ہزارگی اکیڈمیانی سرکماش، اگدہ دار ءُ ایدگہ لبزانت ءُ زانتکاراں ھم بھر زرتگ –

دیوان ءَ کماش سنگت رفیق ءَ ڈاکٹر یوسف خشک ءِ آیگ ءَ شاتکامی درشان کتگ ءُ گوشتگ کہ پاکستان اکادمی ادبیات ملک ءِ مستریں لبزانکی ادارہ انت باید انت اے ادارہ ملک ءِ درستیں ادارھاں ءُ ھاس بلوچی اکیڈمی ءَ را مالی کمک بہ کنت- آئی ءَ گوشتگ کہ اکیڈمی ءَ پہ بلوچی زبان ءُ لبزانک ءِ دیمروی ءَ بازیں پراجیکٹانی پی سی ون جوڑ کتگ انت بلے اکیڈمی ءِ گورا چوشیں مالی واک نیست کہ آ اے پروجیکٹاں پیلو بہ کنت- بلوچی اکیڈمی چہ اکادمی ادبیات ءَ لوٹ کنت کہ آ اے درگت ءَ مالی کمک بہ کنت –

سنگت رفیق ءَ دیمتر ءَ گوشتگ کہ اکادمی ادبیات ایوارڈ کمیٹیاں ءُ ماں اسلام آباد ءَ سیمینار ءُ مراگشاں گوں بلوچی اکیڈمی ءَ شور ءُ سلاہ نہ بیت، بائدیں بلوچی زبان ءُ لبزانک ءِ باروا ھر وڑیں سیمینار یا مراگشے اڑ دیگ بیت انت بلوچی اکیڈمی ءَ شور ءُ سلاہ گرگ بہ بیت۔ ھمے وڑا وھدے اکادمی ادبیات پہ بورڈ آف گورنر ءَ چہ بلوچستان ءَ مردم نامینیت، اے درگت ءَ ھم گوں اکیڈمی ءَ ھم شور ءُ صلاہ گرگ بہ بیت- آئی ءَ دیمتر ءَ گوشتگ کہ بائدیں بلوچی اکیڈمی ءِ سالینہ گرانٹ ودّینگ بہ بیت پرچا کہ انّوگیں گرانٹ اکیڈمی ءِ ھرچ ءُ درچاں پیلو نہ کنت –

اکادمی ادبیات ءِ کماش ڈاکٹر یوسف خشک ءَ اکیڈمی ءِ باسکانی منّت گپتگ ءُ گوشتگ کہ بلوچی اکیڈمی پہ لبزانت ءُ زانت کاراں یک مزنیں پلیٹ فارمے – آئی ءَ گوشتگ کہ بلوچی اکیڈمی ءِ پہ بلوچی لبزانک ءُ زبان ءَ جُھد ستاء کرز انت ءُ اُمیت کناں کہ اکیڈمی ءِ باسک وتی جھداں ھمے وڑا برجم دار انت –

آئی ءَ دیمتر ءَ گوشتگ کہ اکادمی ادبیات ءَ کساس سِی ءُ دو لبزانکی ادارہ رجسٹر انت کہ آھاناں سالانہ گرانٹ رسیت۔ مئے ھر وھد ءَ جُھد ھمیش انت کہ ادارگاں آھانی جھدانی رِداں گرانٹ دیگ بہ بیت –

ڈاکٹر یوسف خُشک ءَ گوشتگ کہ اکادمی ادبیات بلوچی اکیڈمی ءَ را رجانکاری ءِ تَک ءَ کمک کنت۔ اکادمی ادبیات ملک ءِ دراھیں راجانی لبزانکی انسائیکلوپیڈیا ءِ سرءَ کار ءَ انت، بلوچی اکیڈمی پہ بلوچی لبزانک ءِ پولکاری ءَ مئے کمک ءَ بہ کنت-

آئی ءَ دیمتر ءَ گوشتگ کہ پہ اسکالرشپ یا ایوارڈ کمیٹیاں مردمانی نامینگ ءَ بلوچی اکیڈمی وتی شور ءُ سلاہاں دیم ب دنت، ایشانی سرا گامگیج زورگ بیت۔ ڈاکٹر یوسف خشک ءَ گوشت کہ بائدیں اے وڑیں دیوان ہر وہد ءَ جم دارگ بہ بیت ءُ لبزانت ءُ زانتکار یک پلیٹ فارمے ءِ سرا یکجا بہ بنت ءُ وتی جیڑھاں بہ گیشین انت –

دیوان ءِ گڈ سر ءَ بلوچی اکیڈمی ءِ کماش سنگت رفیق ءَ ڈاکٹر یوسف خشک ءَ را چھاپ کتگیں کتابانی سیٹ ئے سوگات کُتگ –