بلوچستان ءَ وتکشی ءُ دگہ وئیلاں سَے مردم بیران جنکوے زدگ

سربوتگیں ھالانی رِد ءَ بلوچستان ءِ بنجاھی شھر شال، ڈیرہ اسمائیل خان، ڈیرہ مراد جمالی ءَ جتا جتائیں وائیلاں سَے مردم بیران جنکوے زدگ بوتگ انت-

گیشیں ھالانی رِد ءَ بلوچستان ءِ بنجاھی شھر شال ءَ شیخ زید نادراھجاہ ءِ نزیک ءَ ناشناسیں مردماں یک مردمے تیر باران کُتگ ءُ کُشتگ –

بیران بوتگیں مردم ءِ پجار سیف اللہ ءِ نام ءَ چہ بوتگ کہ پولیس ءَ آئی ءِ جون دست گپتگ ءُ نادراھجاہ ءَ سر کتگ، اودا اژدری چار ءُ ٹپاس ءَ پد جون کھول ءِ دست ءَ داتگ –

ھمے وڈ ڈیرہ اسمائیل خان ءَ سلاہ بندیں مردمانی تیرگواری ءَ پولیس کارمند ءِ مرتگ ءُ آئی کوش ءِ زمّہ واری ٹی ٹی پی ءَ منّ اِتگ –

تیرگواری ءِ وئیل ڈیرہ اسمائیل خان دمگ پروا ءَ دیم ءَ اتکگ تیر گواری ءَ بیران بوتگیں پولیس کارمند ءِ پجار محمد اسلم ءِ نام ءَ چہ بوتگ –

اھوالکار ءِ رِد ءَ پولیس کارمند بینظیر انکم سپورٹ پروگرام کارگس ءِ دیم ءَ ڈوٹی ءَ بوتگ کہ سلاہ بنداں تیرباران کتگ ءُ کشتگ –

اھوالکار ءِ رِد ءَ سلاہ بنداں پولیس ءِ کارمند ءِ سلاہ ھم گوں وت برتگ – پولیس ءِ کوش ءِ زمہ واری تحریک تالبان پاکستان ءَ منّ اِتگ ءُ گوشتگ اے پولیس کارمند ءِ سلاہ غنیمت ءِ ھساب ءَ گوں وت برتگ –

دگہ وئیل ءِ بلوچستان ءِ دمگ ڈیرہ مراد جمالی ءَ دیم ءَ اتکگ کہ ٹرالر ءِ ڈیکر کنگ ءَ کسانیں جنکو ءِ زدگ ءُ یک مردمے بیران بوتگ –

بیران بوتگیں پرپٹ سوار ءِ پجار دیدار علی مینگل ءِ نام ءَ چہ بوتگ وھدیکہ آئی ءِ ھمراہ کسانیں جنکو فوزیہ بی بی ءِ زدگ بوتگ – پولیس ءَ وت ءَ وئیل جاہ ءَ سر کتگ ءُ بیران ءُ زدگ بوتگیں جنکو نادراھجاہ ءَ سرکتگ انت –

دومی نیمگ ءَ بلوچستان ءِ دمگ شال ءَ یک مردمے ءِ جون ءِ دست کپتگ –

ھمے گوشگ بوگ ءَ انت اے مرد ءَ وتکشی کتگ – وتکشی کنوکے پجار غضفر عباس ءِ نام ءَ چہ بوتگ کہ آئی ءَ وتی گٹ ءَ وت ساد ءِ لوپ کتگ ءُ وت ءَ کُشتگ –