شال: دروگیں میڑانی بگیری ءَ زھرشانی

بلوچ یکجھتی کمیٹی ءِ نیمگ ءَ نوشکی ءُ مستونگ ءَ سی ٹی ڈی ءِ دروگیں میڑ ءُ نشتر نادراھجاہ ءِ چھت ءَ چگل دیگ بوتگیں کساس پنچ سد جون ءُ آھانی ڈی این اے نہ کنگ ءُ جیڑو ءَ جیر ترینگے بگیری ءَ مروچی پنچ شمبے ءِ روچ ءَ شال ءِ بروری دگ ءَ روانک ءِ کشگ بوتگ کہ اودا مزنیں کچ ءَ زالبول ءُ ورنایاں ھوار لس مردماں بھر زرتگ –

روانک بی ایم سی ءَ بندات بوتگ ءُ بروری دگ ءَ اوگام جنان ءَ تاں اسپنی دگ ءُ ھاکی چار راہ ءَ سر بوتگ کہ ھمودا مچی دروشم ءَ زھرشانی کنگ بیتگ –

ھاکی چار راہ ءَ درنگاز کنوکاں دگ بند کتگ ءُ داں دو ادار ءَ نشتگ انت، زھرشانی ءَ ھواریں بیگواھیں مردمانی کھول ءُ سیاسی ءُ انسانی ھکانی گلانی اگدہ داراں تران کتگ –

زھرشانی ءَ تران کنان ءَ بیگواھیں مٹھا خان مری ءِ لوگبانک ءَ گوشتگ کہ ما ھما ازاب ءَ گوزگ ءَ اِنت کس اندازگ جت نہ کنت مٹھا خان مری ءِ آوار جنی ءَ ما مالی ءُ ماژگی جیڑھاں دچار اِنت – زھگاں وانگجاہ ءَ پیپر پہ نبشتہ ءَ دیگ بنت زھگ آھانی سر ءَ “مٹھا خان مری یل کنگ بہ بیت” اوگام ءَ نبشتہ کن انت، ما گرانتریں ساھتانی تہ ءَ گوزگ اِنت –

آئی ءَ چہ ریاستی ادارھاں وتی لوگواجہ ءِ یل کنگ ءِ لوٹ کتگ گوشتگ کہ مئے سر ءَ رھم بہ کن ایت مئے زند مارا واتر کنگ بہ بیت – اگاں آئی ءَ گیر کانودی کارے کتگ گڈا آمیدگس ءَ آرگ بہ بیت ءُ سزا دیگ بہ بیت –

بیگواھیں زاکر مجید ءِ مات ءَ تران کنان ءَ گوشتگ کہ ھر ھما وھد ءَ جون ءِ کپگ ءِ ھال کئیت مئے پُپ ترک انت کہ مئے زھگ جنگ مہ بیت درستاں زھگ ھست درستانی ھاتر ءَ دل ءِ تہ ءَ درد ھست –

چہ آواران ءَ سفر خان ءِ وارس ءَ تران کنان ءَ سرکار ءُ ریاستی ادارھاں گوں لوٹ کتگ گوشتگ کہ مارا چہ شما ھچی نہ لوٹیت بس مئے دوستیگیں مردم یل کنگ بہ بنت کہ پہ آھاں ما ھمک روچ تلوسگ ءَ اِنت بلے آھانی ھچ ھال ءُ بود نیست آ اودا چی وڈ زند گوازینگ انت کس اندازگ جت نہ کنت –

مھر گل مری ءِ گھار ءَ زھرشانی ءَ تران کنان ءَ گوشتگ کہ مھر گل مری ءِ روگ ءَ پد گشے کیامت اتکگ بلے آ اے گپ ءَ سرپد نہ انت کہ آئی ءِ روگ ءَ پد مئے ھال چی اِنت چوں زند گوازینگ ءَ انت – مھر گل مری سرکاری نوکرے آ ھچ وڈیں کتکاریاں ھوار نہ اِنت کہ انچو وھد ءَ بیگواہ کنگ بہ بیت – مئے سر ءَ رھم کنگ بہ بیت ءُ آ یل کنگ بہ بیت – بید آئی ءَ مئے زند کیامت ءِ دابیں ازاب ءِ تہ ءَ گوزگ اِنت –

بیگواھیں رشید ءُ آصف بلوچ ءِ گھار ءَ تران کنان ءَ گوشتگ کہ ما ھمے پھم اِتگ کہ شما مارا پھریز ایت بلے شما مئے کُشندہ جوڈ بوتگ ات، اے ریاست ءَ مئے کودکی، زانت ءُ واب دراہ پچ گپتگ انت، ھما براتانی ھاتر ءَ ما رد ھیال کت نہ کنیں مروچی ھما زنداناں بندیگ کنگ بوتگ انت ما ھچ ءَ سرپد نہ ایں کہ اودا آھانی ھال چی اِنت –

آئی ءَ چہ ریاست ءَ وتی براتانی یل کنگ ءِ لوٹ کتگ ءُ گوشتگ کہ رانا ثنا ء اللہ ءَ مارا باور کنائینتگ ءُ گوشتگ کہ چدو دیم ھچ وڈیں زورانسری آوار جنگ بوتگیں مردم دروگیں میڑ ءَ کُشگ نہ بنت بلے ھر ھمک روچ الم جون ءِ کئیت – وھدیکہ آھاں چہ مارا آھانی یل کنگے سَے ماھے مھلت لوٹ اِتگ –

زھرشانی ءَ تران کنان ءَ ایچ آر سی پی ءِ رھشون عبداللہ بلوچ ءَ گوشتگ کہ ھچ وڈیں ریاست وتی دمگی مردمانی گوم ءَ چوش نہ کنت کہ بلوچ راج ءِ گوم ءَ کنگ بوگ ءَ اِنت – بلے اے راج ءَ مروچی ھم وتی امیت یل نہ کتگ انت چہ ریاست ءَ انساپ ءِ لوٹوک انت –

سعدیہ ءَ تران کنان ءَ گوشتگ کہ دنیائے ھچ وڈیں کانود ھچ پوج ءَ اے اجازت ءَ نہ دنت کہ وتی دمگی مردماں بہ کُشیت بلے پاکستان ءِ تہ ءَ بلوچانی گوم ءَ درآمیدگسی ءُ کانودی اے دراہ بوگ ءَ انت –

زھرشانی ءِ گڈسر ءَ ڈاکٹر مھرنگ بلوچ ءَ تران کنان ءَ گوشتگ کہ ریاست ھمک روچ مئے جوناں چگل دیگ ءُ مارا ھمے پیام ءَ دیگ انت کہ مئے چک چینی ءَ روچ پہ روچ گیشی آرگ بیت – وھدیکہ اے چکچینی ءَ تھنا پوج ناں بلکنہ آمیدگس، پارلمنٹ ءُ اھوالکار ھم اے کتکاریاں پیلو کنگ ءَ انت – یک اھوالکار ءِ دروگیں انکاؤنٹر ءَ ھنچوش پیش داریت کہ بلوچستان ءَ پوج ءِ سر ءَ اُرش بیت ھمے ھاتر ءَ فیک انکاؤنٹر ءَ بیگواھیں مردم نشانگ کنگ بنت – اشی ءَ چہ پدر بیت کہ پاکستان ءِ ھر تک بلوچ چکچینی ءَ ھوار اِنت – پمے ھاتر ءَ نوں بلوچ راج ءَ پیسلہ کنگی اِنت کہ آ اے زلم زوراکیانی دیمپانی کنان ءَ اے زالمانی بگیری ءَ جھد کنگی اِنت، یا ھاموشی ءَ ھنچوش مران بہ ایں –