کراچی: زندان ءَ بندیگیں بلوچ ورنایے زندان تہ ءَ بیران بیتگ

کراچی ءِ اولڈ سڑی ایریا، چہ بھیم پورہ ءَ منشیات باپاری ءِ بھتام ءَ دزگیر کنگ بیتگیں ورناہ کراچی ءَ لانڈھی زندان ءَ بیران بیتگ-

بیران بیتگیں ورنائے ءِ پجّار صابر بلوچ نام ءَ چہ بیتگ کھول رِد ءَ صابر نیپیئر پولیس ءَ دزگیر کتگ-

نیپیئر پولیس رِد ءَ صابر ء اشرف 3 اگست ءِ سُھب ءَ سالار کمپاؤنڈ ءَ پولیس چوکی ءِ نزیک ءَ شکی ھساب ءَ دیستگ ءُ پٹ ءُ پول کتگ گڑا اشی ءِ کر ءَ چہ 60 گرام ھیروئن سے کاگدانی تہ ءَ دزکپتگ اَنت، کہ آ دزگیر کتگ ءُ ایف آئی آر نمبر 216/22 نکش کتگ-

پد ءَ کُتکار جوڈیشل ریمانڈ ءَ لانڈھی زندان ءَ دیم دیگ بیتگ ءُ آئی ءِ بگیر ءَ آمیدگس ءَ نکش کنگ بیتگ-

کھول رِد ءَ آیاں لاش جناح نادُراھجاہ ءَ ساڑی بیگ ءِ ھال دیگ بیتگ ءُ پولیس ءَ بھتام جتگ کہ صابر ءِ مرگ ھمے نشہ سبب ءَ بیتگ-

لانڈھی ڈسٹرکٹ زندان ملیر ءِ سپرنٹنڈنٹ محمد ارشد ءِ رِد ءَ بندیگیں صابر نشہ ءِ آماچ بیتگ-

یکشمبے 16 اکتوبر ءَ آئی ءِ تبیت ھراب بیتگ ءُ آ جناح نادُراھجاہ ءَ برتگ-

سپرنٹنڈنٹ زندان ءِ رِد ءَ نادُراھجاہ ءَ الاج وھد ءَ صابر بیران بیتگ-

آئی ءَ گْوشتگ کہ کانودی ھساب ءَ 176 ءَ مجسٹریٹ ءِ چار گوزاری ءَ لاش پوسٹ مارٹم کنگ بیگ ءَ اِنت کہ رپورٹ آھگ ءَ مرگ ءِ سبب زانگ بیت –