کوھلو ءِ جاھمنند لُردیں آپانی ورگ ءَ بازیں نادراھیانی آماچ

بلوچستان ءِ دمگ کوھلو ءَ ھار آماچیں مھلوک ءِ جیڑو ءُ جنجال ھنگت کم نہ بوتگ انت دمگے بازیں ھنداں ھار آماچیں مردم لردیں آپ ءِ ورگ ءَ لاچار انت –

کوھلو ءِ دمگ کلی چرمی، کلی سردار شھر، کلی فیروز خان، نیوکلی، نیصوبہ، ٹاؤن، گاڑدواغ، ملک زئی ھوار دگہ دمگان ورگی ساپیں آپ نیست اِنت چریشی ءِ سوب ءَ اودے مردم لردیں آپانی ورگے سوب ءَ ڈائریا، گیسٹرو وڈیں دگہ نادراھیانی آماچ بوان انت –

کوھلو ءِ مردمانی رِد ءَ ماھے بیت کہ ورگی آپ نیست اِنت چریشی ءَ توپان ءِ آپ بازیں جاھاں کنڈ، واٹر سپلائی ءِ پیپانی تہ ءَ ھوار بوگے سوب مردم بازیں نادراھیانی آماچ بوان انت – اے درگت ءَ پی ایچ ای ءِ واکدار ءُ دگہ سرپدی داتگ انت بلے تنی وھدی ھچ بوگ ءَ نہ انت –

آھانی گوشگ انت کہ واکدار بازیں واش سنٹر ءُ دگہ جاھاں آپ سر کنگ انت وھدیکہ بازیں دمگان اے ھم گوشگ بوگ ءَ انت کہ آپ ٹینکر والا زر زور انت بلے آپ سر نہ کن انت – ادے مردم پہ پٹ ءِ آپ تلوسگ انت – کوھلو ءِ ڈپٹی کمشنر ءِ گوشگ ءَ پد ھم ھچ وڈیں گیش گیواری گامگیج زورگ بوگ ءَ نہ انت –

آھانی گوشگ ات کہ ادے مردم سک باز دلسیاہ انت کہ کجا برو انت کئے گور ءَ وتی ارز ءَ بہ بر انت پرچاکہ ادا گیشتر بزگریں مردم انت – کہ روز ءِ سر ءَ کار کن انت ءُ روچ ءِ پنچ سد کلدار گر انت اے زراں آ آپ بہ زور انت یا وتی زھگاں لاپ بہ دے انت – اے دمگ ءَ ٹینکرانی ھم نھاد ءِ لڑ نیست آپ ءِ نہ بوگ ءَ آ زیادھی کنگ ءَ انت یک ٹینکر 1500 بگر تاں 2500 بھا کنگ ءَ انت وھدیکہ بازیں ٹینکرانی ٹانکی ھم کسان انت نوں مھلوک دلسیاہ انت کہ چی بہ کن انت –