شال: فزیو تھراپسٹانی دزگیری ءِ بگیری ءَ زھرشانی

بلوچستان ءِ بنجاھی شھر شال ءَ فزیو تھراپسٹ ایسوسیشن ءِ چیردستی ءَ گوستگیں روچاں زھرشانی ءَ نشتگیں سنگتانی سر ءَ پولیس ءِ کریک ڈاؤن ءُ دزگیری ءِ بگیری ءَ روانک ءِ کشگ بوتگ ، روانک ءَ نودربرگلانی باسک ھم ھوار بوتگ انت –

ھمے میان ءَ نودربر گلانی باسک ءُ فزیوتھراپسٹاں زھرشانی روانک کش اِتگ ءُ بلوچستان اسمبلی دیم ءَ نندانک ءَ نشتگ انت – درنگاز کنوکاں سرکار ءِ بگیری ءَ فزیوتھراپسٹانی لوٹانی ھک ءَ نارہ جتگ –

زانگ بہ بیت فزیوتھراپسٹ ڈاکٹراں بازیں ماھے بیت کہ شال ءَ وتی لوٹانی ھک ءَ نندانک ءَ نشتگ بوتگ انت ءُ آھاں پنچ روچ انت کہ شال ءِ ریڈزون ءَ نندانک ءَ نشتگ انت –

گوستگیں روچ ءَ شال ءِ ریڈ زون ءَ نندانک ءَ نشتگیں مردین ءُ زالبولیں فزیو تھراپسٹانی سر ءَ پولیس ءَ لٹ شاپی کتگ ءُ دزگیر کتگ انت – درنگاز کنوکانی گوشگ انت کہ پولیس ءِ لٹ شاپی ءُ زوراکی ءَ فزیو تھراپی ایسوسیشن کمیٹی ءِ زالبولیں باسک ءِ بے ھوش بوتگ –

ڈاکٹرانی گوشگ ات کہ بلوچستان ءُ دگہ سوبھانی نادراھجاھانی تہ ءَ الاج ءَ زمین آزمان تپاوت انت – بلوچستان ءِ کُنڈ کنڈ ءَ گیشتر نادراھ وتی الاج ءَ پہ دگہ سوبھاں رو انت کہ اشی ءِ تہ ءَ ھچ شک نیست کہ اودا گیشتر آسراتی ھست انت – اے آسراتیانی تہ ءَ یکے فزیوتھراپسٹ ءِ ڈاکٹر انت کہ جاندراھی ءَ وتی کرد ءَ پیلو کن انت بلے بلوچستان ءَ سرکار ءِ نیمگ ءَ اے یکشل ءَ دلگوش دیگ بوگ ءَ نہ انت –

درنگاز کنوکاں ھمے وھد ءَ سرکار ءِ دیم ءَ وتی سَے لوٹ پیش کتگ انت لوٹ چو اے وڈ انت کہ دزگیر کنگ بوتگیں درسیں فزیوتھراپسٹ یل کنگ بہ بنت، فزیو تھراپسٹانی بگیری ءِ ارزی ھلاس کنگ بہ بیت ءُ ایسوسیشن لوٹانی سر ءَ گامگیج زورگ بہ بیت –

آھانی گوشگ ات کہ ما بلوچستان ءِ سرکار ءَ گوشگ لوٹیں کہ مئے لوٹاں سنجیدگی ءَ گوں بہ منّ ایت مارا وتی کار کنگ ءِ موہ ءَ بہ دنت – اگاں دو روچ ءِ تہ ءَ مئے لوٹ منّگ نہ بوتاں گڈا ما لاچار بہ ایں کہ شدکشیں زھرشانی ءَ بہ نندیں اگاں اے میان ءَ مارا تاوان ءِ رست گڈا اشی ءِ زمہ دار سرکار انت –