بلوچستان ءِ بنجاھی شھر شال ءَ وائس فار بلوچ مسنگ پرسنز ءِ شدکشیں ھرتالی بنجل ءَ چار ھزار ءُ ھپت سد ءَ نود ءُ یک روچ سرجم بیتگ، ھمدردی ءِ واستا ایچ آر سی پی لاھور ءِ بنجاھی کونسل ءِ باسک حسین نقوی، ہیومین رائٹس ایکٹیوسٹ ماھین پراچہ، ایچ آر سی پی بلوچستان ءِ حبیب طاھر، فرید شاھوانی، اھوالکار اکبر نوتیزئی ءُ دگہ دگہ ھوار بیتگ اَنت-
وی بی ایم پی ءِ وائس چیئرمین ماما قدیر بلوچ ءَ گشتگ کہ اکتوبر ءِ ماہ ءِ بندات ءَ پاکستانی پوج ءَ بلوچ سرڈگار ءَ ھونریچی بندات کتگ ءُ اے ماہ ءِ بندات ءَ ڈیرہ مراد جمالی ءَ چار زورانسری آوار جنگ بیتگیں مردم ناشرکار گوشگ بیتگ ءَ دروگیں جنگ ءِ نام ءَ شھید کنگ بیتگ اَنت-
آئی ءَ گوشتگ کہ راجدپتر گواہ اِنت پاکستانی پوج ءَ بنگالی زالبول، زھگ، کماشانی کشت ءُ کوش ءُ ھزارانی بنگالی زالبولانی گون ءَ سلکاری وڑیں دردناکین وئیلانی کنگ ءَ پد آئی ءَ بنگلہ دیش گپت نہ کتگ گڈسر ءَ داں آئی ءَ راجدپتر ءِ دیم ءَ پروشی ءِ دیمپانی کنگ کپتگ –
ماما قدیر بلوچ ءَ گشتگ کہ ھزاراں بلوچ پُسگ زورانسری آوار جنگ بیتگ اَنت ھچ سرپدی نیست اِنت آ چونین جاورانی دیمپان اَنت چونیں چونیں درد سگگ ءَ اَنت آیانی ھالاں ھما مات سرپد بیت آئی ءِ زھگ ءِ زندانی اِنت-
آئی ءَ دیمتر ءَ گوشتگ کہ بلوچ ھچ جاہ ءَ ھم کجام ھم میان اُستمانی تاکت ءِ منت ءَ نہ گپتگ بلکیں وتی جد ءُ جھدانی درچانی اِنت مروچی بلوچ ءَ بازیں ھیلینگانی دیمپانی اِنت، نیکراھی گنوک، ٹکی سوچ، شبزرکیں سیاسی پاٹیانی کرد ھوار اَنت مروچی وھد اِنت کہ بلوچ درستاں ھوار بہ بیت ءُ بیگواھیں مردمانی یل کنائینگ ءَ وتی کرد ءَ پیلو بہ کن اَنت ءُ وتی گوھاراں یک آوکیں بانداتے بہ بکش اَنت-