زورانسری آوار جنگ بوتگیں ڈاکٹر جمیل بلوچ یل بوتگ

ھشت ماہ ساری چہ بارکھان ءَ زورانسری آوار جنگ بوتگیں نیشنل ڈیموکریٹک پاٹی ءِ سینٹرل کمیٹی ءِ باسک ڈاکٹر جمیل بلوچ مروچی یل بوتگ ءُ وتی گِس ءَ سربوتگ –

ڈاکٹر جمیل بلوچ ءِ یل بوگ ءِ ھبر بیگواھیں مردمانی پانکجنیں گل وائس فار بلوچ مسنگ پرسنز ءَ راست کُتگ-

ڈاکٹر جمیل بلوچ ھمے سال ءِ بیست ءُ سَے فروری ءَ چہ بارکھان ءَ ریاستی ادارھانی کارمنداں ھما وھد ءَ زورانسری آوار جتگ ءُ بیگواہ کتگ وھدیکہ وتی دکان ءَ نندوک بوتگ – ریاستی ازیت جاھاں ھشت ماھانی گوازینگ ءَ پد مروچی یل بوتگ ءُ وتی گِس ءَ سربوتگ –

ڈاکٹر جمیل بلوچ ءَ وتی آوار جنی ءَ پیش بارکھان ءِ تہ ءَ لوکل ڈومیسائل جیڑہ چست کتگ بوتگ، دمگی مردمانی نیمگ ءَ بازیں روچاں زھرشانی پد سوبین بوتگ ءُ اے زھرشانی ءَ پد دمگی واکداراں سدانی کچ نان لوکل مردمانی ڈومیسائل رد کتگ انت –

ڈاکٹر جمیل ءِ آوار جنی ءِ دومی روچ ءَ آئی ءِ دگہ دو سنگت ھم آوار جنگ بوتگ انت کہ ھمے جیڑوے سر ءَ وتی کرد ءِ پیلو کتگ بلے چیزے وھداں پد اے ھردو ورنا زاھر کنگ ءُ پدا یل کنگ بوتگ انت –

زانگ بہ بیت بلوچستان ءِ جتا جتائیں ھند ءُ دمگاں پاکستانی پوج ءُ چیریں ادارھانی کارمنداں مزنیں کچ ءَ سیاسی باسک، رھشون ، نودربر ءُ ھر تک ءُ پھناتاں سیادی داروکیں مردم آوار جتگ ءُ بیگواہ کتگ انت ءُ آھانی تہ ءَ بازینے ءِ ژانگولیں جون دست کپتگ انت ءُ بازینے ھنگت گار ءُ بیگواہ انت- بیگواھیں مردمانی پانکجنیں گل وی بی ایم پی ءِ رِد ءَ تنی وھدی پنجاہ ھزار ءَ گیش مردم آوار جنگ بوتگ انت ءُ اے آوار جنیانی درچ یکشل ءَ برجاہ انت-