سَے ملکی سریز: پاکستان ءَ بنگلہ دیش ھپت وکٹوں پروش داتگ

نیوزی لینڈ ءَ برجاھیں سے ملکی ٹی 20 سیریز ششمی گوازی پاکستان ءَ بنگلہ دیش ھپت وکٹاں پروش داتگ –

پشمبے ءَ کرائسٹ چرچ ءَ بنگلہ دیش ءَ ٹاس کٹ اتگ ءَ بندات ءَ گوازی کنگ بندات کتگ بیست آوارانی تہ ءَ شش وکٹانی تاوان ءَ یک سد ءُ ھپتاد ءُ سَے رن جوڑ کرتگ ات ءُ پاکستان ءَ کٹگ ءِ واستا یک سد ءُ ھپتاد ءُ چار رن درکار بیتگ اَت-

پاکستان ءَ اے چیلنچ سَے وکٹانی تاوان ءَ یک بالے ءَ پیسر سرجم کرتگ ات- مھمد نواز ناٹ آوٹ بیتگ ءُ آئی ءَ بیست بالانی توک ءَ چل ءُ پنچ رن جوڑ کرتگ کپتان بابر اعظم ءَ چل بالانی توک ءَ نَھ چوکاھانی زور ءَ پنجاہ ءُ پنچ رن جوڑ کرتگ ات-

بنگلہ دیش ءَ اولی وکٹ ھپت ءُ دومی چل ءُ دو رن ءِ سرجم بیگ ءَ کپتگ –

بنداتی دو وکٹاں پد لٹن داس ءُ شکیب الحسن ءَ پاکستانی بولرز ءِ دیم ءَ مھکمی ءَ اوشتاتگ اَنت ءُ لٹن داس ءَ چل ءُ دوبالانی توک ءَ شست ءُ نُھ رن جوڑ کرتگ ءُ آوٹ بیتگ ءُ شکیب الحسن ءَ چل ءُ دو بالانی توک ءَ شست ءُ ھشت رن جوڑ کرتگ-

پاکستانی بولرز نسیم شاہ ءَ چار آوارانی توک ءَ بیست ءُ ھپت رن داتگ ءُ دو وکٹ گپتگ انت-

ھمے وڑ مھمد وسیم ءَ چار آوارانی توک ءَ سی ءُ سَے رن داتگ ءُ دو وکٹ گپتگ اَنت-

ھردوکیں ٹیمانی میانی سریز ءَ اولی میچ ءَ پاکستان ءَ بنگلہ دیش بیست ءُ یک رناں پروش داتگ-

چار شمبے ءِ روچ ءَ نیوزی لینڈ ءِ گون ءَ میچ ءَ بنگلہ دیش ءَ چل ءُ ھشت رناں پروش وارتگ ءُ آ فائنل ءَ چہ ھلاس بیتگ-

پاکستان کرکٹ ٹیم ءَ اشی ءَ پیسری سریزی ءَ سَے میچانی توک ءَ دو کٹ اتگ ءُ یکے ءَ پروش وارتگ ات-

پاکستان ءُ بنگلہ دیش ءِ میان ءَ داں انگت ءَ شانزہ ٹی ٹوینٹی میچ بیتگ اَنت ءُ چاردہ پاکستان ءَ کٹ اتگ اَنت دو بنگلہ دیش ءَ کٹ اتگ اَنت-

سے ملکی ٹی ٹوینٹی سریز ءِ فائنل پاکستان ءُ نیوزی لینڈ ءِ میان ءَ آدینگ ءَ گوازی کنگ بیت اِنت-