روکپتی بلوچستان: پانزدہ روچ پیسر گرگ بیتگیں پنچ جنکانی توک ءَ یکے یل بیتگ

روکپتی بلوچستان ءِ دمگ چھبار ءَ پانزدہ روچ پیسر ایرانی لشکر ءَ پنچ جنک آوار جتگ ءَ بیگواہ کرتگ ات کہ اشانی توک ءَ یکے یل بیتگ-

گیشیں چھبار ءَ گرگ بیتگیں پنچ جنکانی توک ءَ یکے گوستگیں روچ ءَ یلو کنگ بیتگ ءُ وتی لوگ ءَ سر بیتگ-

اے جنک پانزدہ روچ پیسر چھبار ءَ ھما وھد ءَ آوار جنگ بیتگ اَنت کہ اود ءَ پانزدہ سالی ئیں جنکوے ءِ سر ءَ پولیس ءِ سلکاری ءِ بھتام ءَ زھرشانی بیگ ءَ بیتگ-

پولیس ءِ رد ءَ اے ھرپنچیں جنک زھرشانی ءَ ھوار بیتگ اَنت ءُ آیاں سرکار ءِ ھلاپ ءَ اوگام جتگ- بلے دومی نیمگ ءَ اے گپ آیانی کھول ءَ رد کرتگ ات ءُ گشتگ کہ مئے زھگ بازار ءَ ساز ءُ سامان ءِ زورگ ءَ شتگ اَنت اود ءَ دزگیر کنگ بیتگ اَنت-

آوار جنگ بیتگیں جنکانی پجار نگین محتشمی، ارزو رئیسی، سارا رئیسی، مھر ناز عمرزئی، فاطمہ بلوچ ءُ عائشہ بلوچ ءِ ناماں زانگ بیتگ اَنت –

اشانی توک ءَ نگین محتشمی یل کنگ بیتگ ءُ آ دگہ زاھدان ءَ بندیگ اَنت –

اے جنکانی سر ءَ ایرانی لشکر ءَ زھرشانی ءَ ھواری ءِ بھتام جتگ ءُ دزگیر کتگ ات اَنت ءُ جنکانی کھولاں دزگیری ءِ وھد ءَ گوشگ بیتگ کہ شمئے مردم یک ءُ دو روچ ءِ واستا پٹ ءُ پول ءَ پد یل کنگ بنت بلے چریشی ءَ آبید آیانی مردم بازیں روچانی گوزگ ءَ پد ھم یل نہ بیتگ اَنت-