نبشتانک : تو بلوچے ئے؟
نبشتہ کار : ھمبل بلوچ
دی بلوچستان پوسٹ
گُش اَنت کہ زبان انسان ءِ کُبل ءِ کلیت اِنت کہ چہ کلیت ءَ کُبل پچ بیت ءُ انسان زانگ بیت کہ انسان ءِ تہ ءَ چونیں تب ءِ مردمے ءُ کُجام راج ءَ بندوکیں انسانے ؟-
گپ اے نہ اِنت کہ من دَری زباناں نہ پھم آں یا ھبر کُت نہ کن آں من پمیشکا گوں دری راج ءُ دَری زبان ءِ مردماں بلوچی ءَ ھبر کن آں کہ راج ءِ زندگ دارگ ءِ راہ ھمیش اِنت چیا کہ مردم گوں وتی زُبان ءَ زانگ بنت ۔
من ءُ سنگتے ماں کراچی ءِ دمگاں پہ چیزے ءِ شُوھاز ءَ در کپتگ ایں من گوں دکانداراں بلوچی ھبر کنان ءَ اِت آں من اے ھم زانگ ءَ اِت آں کہ دیم ءِ مردم بِزاں کہ دکاندار بلوچ نہ اَنت ءُ بلوچی زبان ءَ نہ پھم اَنت گُڑا منی ھمراہ (سنگت) ءَ من ءَ گُشت تو یکپارگی ھندی بِہ کن انکس وت ءَ چی ءَ پیشدار ئے (شو کن ئے ) تو زان ئے آ بلوچی نہ زان اَنت ءُ بلوچ نہ اَنت من پسّہ دات، من مُدام گوں دَری راج ءُ دَری زبان ءِ مردماں ماں بلوچی ءَ ھبر کن آں ،منی اولی ھبر بلوچی ءَ بیت بزاں کہ من اولی ءَ بلوچی ءَ جُست ئِے کن آں ، وھدے کہ دگہ درآمدانی شھر ءُ دیاراں کہ منی سر کپ اِیت گُڑا من بلوچی ھبر کن آں ، اگاں دیم ءِ مردم بلوچے بوت من ءَ سک وشّی بیت اِنت-
اگاں دیم ءِ مردم ءَ بلوچی نہ پھم اِت ءُ پسّّہ ئِے نہ دات گڑا من ءَ الّم ءَ جُست کنت “تو بلوچے ئے؟”من پہ شان ءِ سینگ ءَ مِکّ کنان ءُ گش آں “ھو من بلوچے آں” –
اے ساھت ءَ من پھر بند آں ءُ سک وشّی بیت اِنت اگاں دیم ءِ مردم منی ھبراں سرپد مہ بیت گُڑا الّم من ءَ ھمے جُست ءَ کنت ءُ گُش اِیت تو کُجام زبان ءَ گپ ءَ ئے من تئی زبان ءَ پھمگ ءَ نہ آں، گُڑا من پہ شانے گُشان ئِے “من بلوچے آں ءُ من بلوچی زبان ءَ ھبر کنگ ءَ آں”-
اے ساھت ھم من ءَ وشیانی باھوٹ کن اَنت بزاں اے گپ ءُ ھبراں چہ منی زبان زانگ بیت اگاں منی زبان زانگ بوت گڑا الّم ءَ منی راج ھم دگنیا ءِ دیم ءَ یک مھکمیں راجے منّگ بیت اِنت گڑا پرچا ما وتی زبان ءَ شنگ مہ کن اِیں؟ گڑا پرچا ما وتی زبان ءَ ھبر مہ کن ایں؟ گڑا پرچا ما وتی زبان ءَ نبشتہ مہ کن ایں ؟ گڑا پرچا ما وتی زبان ءَ دری آنی دیم ءَ ھبر کنگ ءَ میار بہ کن ایں ؟-
شالا ھر بلوچ وتی زبان ءِ ارزشت ءَ سرپد بات ءُ ھر بلوچ پہ بلوچی زبان ءِ دیمروئی ءَ جُھد بہ کنات ءُ بلوچی زبان دیمروی بہ کنات۔
شالا اَنچوش بات۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔