پنجاپ: سرکار بی ایل اے ءَ گوں گند ءُ نند بہ کنت – فیصل بشیر ءِ کھول

پنجاپ ءِ دمگ پتوکی ءَ مردم مزنیں کچے ءَ دگانی سر ءَ در اتکگ بلوچ لبریشن آرمی ءِ دست ءَ دزگیر کنگ بوتگیں فیصل بشیر ءِ یل کنگ ءِ لوٹ کتگ ءُ چہ سرکار ءَ ھم لوٹ کتگ کہ سرکار بی ایل اے ءَ گوں گند ءُ نند بہ کنت ءُ فیصل ءَ یل بہ کنائینیت –

درنگاز کنوکانی گوشگ ات کہ سرکار وتی کرد ءَ پیلو بہ کنت ءُ فیصل بشیر ءِ زند رکینگ ءَ وتی کرد ءَ پیلو بہ کنت –

ھمے وھد ءَ فیصل بشیر ءِ مات ءُ پت ءَ گوشتگ کہ گل ءِ گوشگ پد ءَ بندیگانی رد ءُ بدل ءَ سرکار گند ءُ نند بہ کنت –

زانگ بہ بیت گوستگیں ماہ ءَ بلوچ لبریشن آرمی ءَ پوج ءِ دو کارمندانی دزگیری ءِ درشان داتگ ءُ اشی ءِ زمّہ واری منّ اِتگ ات –

وئیل ءَ پد بلوچ لبریشن آرمی ءِ جارکش جیئند بلوچ ءَ رسانکدراں وتی شنگ کرتگیں درشان ءِ تہ ءَ گوشتگ ات کہ سینئر کمانڈ کونسل ءَ اے گپ ءِ منّ اِتگ بین الاقوامی کنونشنز ءُ جھانی جنگی رھبندانی پلامرزی کنان ءَ پاکستان پوج ءِ گون ءَ جنگی بندیگانی رد ءُ بدل کنگ ءِ امل بندات کنگ بیت اِنت-

جارکش ءَ گوشتگ کہ بیست ءُ پنچ ستمبر سال دوھزار ءُ بیست ءُ دو ءَ بی ایل اے ءِ ایلیٹ فورس (ایس ٹی او ایس) بزاں اسپیشل ٹیکٹیکل آپریشنز اسکواڈ ءَ ھرنائی ءِ دمگ زردآلو ءَ انٹیلیجنس ھال دیگ ءَ بیڑ برتگ ءُ پاکستان ملٹری انٹیلی جنس ءِ یک کارمندے ءُ پاکستانی پوج ءِ جے سی او ( جونیئر کمیشنڈ آفیسر) ءِ دزگیر کتگ انت – بی ایل اے نوں بلوچ راجداریں بندیگانی بدل ءَ دژمن ءِ اے بندیگاں یل کنت –

جارکش ءَ گوشتگ کہ بی ایل اے ءِ انٹیلی جنس ونگ ءَ اے راستیں ھال سر بوتگ کہ پاکستانی پوج ھرنائی ءِ کش ءُ گوراں چاریگری ءِ مشن بندات کنگ ءَ انت – ھمے ھالانی رِد ءَ بازیں روچاں پٹ ءُ پول کتگ گڑا ھمے راستی دیم ءَ اتکگ کہ پاکستانی پوج ءِ دو کارمند لس مردمی پوشاک گور ءَ کن انت ءُ شپ ءِ وھد ءَ مساپر کشیں کوچے ءَ سپر کن انت تانکہ آھانی سر ءَ شک کنگ مہ بیت انت – اے دژمن کارمنداں ھمے دمگانی تہ ءَ بلوچ جھد کارانی بگیری ءَ چیریں راز پٹکی بوتگ انت –

بلے پدا ھم تنی وھدی سرکار ءُ پوج ءِ نیمگ ءل اے درگت ءَ ھچ وڈیں درشان دیگ نہ بوتگ ءُ تنی وھدی پاکستانء پوج ءِ کارمند بی ایل اے ءِ بندیگ انت –