ماژگی جاندراھی ءِ میان اُستمانی روچ سرجمیں جھان ءَ دارگ بوتگ

میان استمانی جانسلامتی ادارہ ءِ نیمگ ءَ ھر سال دہ اکتوبر ءَ ماژگی جاندراھی ءِ درگت ءَ میان استمانی روچ دارگ بیت اِنت ءُ اے سال ءَ ھمے ماژگی جاندراھی ءِ بنگپ ءِ سر ءَ ھرجاہ دارگ بوتگ –

زانتکارانی گوشگ انت کہ بازیں ماژگی نادراھانی درساں کستریں نادراھی ڈپریشن ءُ اینگزائٹی انت کہ دگہ بازیں نادراھیانی سوب ھم جوڑ بنت ءُ ھر سال ھمے دؤیں نادراھیانی سوب ءَ استمانی زرکاری یک کرب ڈالر ءَ گیش تاوان بیت اِنت –

میان استمانی جانسلامتی ادارھ ءِ رپورٹ ءِ رد ءَ ماژگی نادراھی ءِ درساں کمتریں بھر ڈپریشن انت کہ سرجمیں دنیا ءَ سِی کروڈ مردم اشی ءِ آماچ انت اے نادراھی ءَ ابید ھم ماژگی نادراھی ءِ دگہ بازیں بھر ھست انت کہ تیزی ءَ گوں شنگ بوگ ءَ انت –

زانگ بہ بیت بلوچستان ءَ مدامی وتکشی ءِ وئیل بوگ ءَ انت ڈاکٹر ءُ جانسلامتی درگت ءَ کار کنوکیں گلانی گوشگ انت کہ بلوچستان ءَ اے وتکشی ءِ وئیل گیشتر ڈپریشن ءُ دگہ ماژگی نادراھیانی سوب ءَ بوگ انت –

دی بلوچستان پوسٹ ءِ یکجاھ کتگیں کچ ءُ کساسانی رِد ءَ ھمے سال ءَ پنجاہ مردماں وت کُشی کُتگ –

سائیکیٹریک سوسائٹی ءِ رِد ءَ اے دمگاں یک نیمگے نفسیات ءِ زانتکارانی کمی انت ءُ دومی نیمگ ءَ سرکاری نادراھجاھاں نفسیات ءِ زانتکارانی آسراتی نیست انت ءُ پدا ھمودا کہ ھست انت اود ءَ پد ءَ ڈاکٹر نیست –

جانسلامتی ءِ زانتکارانی رِد ءَ ماژگی نادراھی ءِ آماچیں مردماں وتی چاگرد ءِ بھر جوڑ بہ کن ات، ماژگی نادراھاں پاگل مہ گوش ایت ءُ اے وڑیں مردماں واتر ھما پیش وڑ ءَ زند گوازینگے ھاتر ءَ گامگیج بہ زو ایت –

نفسیات ءِ زانتکارانی رِد ءَ پاکستان ءِ آبادی سِی ءُ چار درسد ماژگی زور، انزائٹی ءُ ڈپریشن ءِ آماچ انت، یک نیمگے بیروزگاری، امن ءُ ایمنی ءِ نگیگیں جاور ءُ توپان وڑیں ازاب ءِ آیگ ءَ کہ یک نیمگے چاگرد جانی تاوان رس اتگ ءُ دومی نیمگ ءَ ماژگی جیڑہ ھم سک باز کرتگ انت –