نبشتانک: ازیم دوست ءِ ودار
نبشتہ کار: زھیر بلوچ
دی بلوچستان پوسٹ
بلوچستان ھستیں وھد ءَ ارسانی دوار جوڑ بوتگ۔ ھمک گورا کہ چماں شانک دے گُڑا ترا بس ارسیگیں چم گندگ ءَ کئیت بلوچ گُلزمین زوراکیانی ارجان اِنت اے زوراکاں بلوچ ءِ زندمان ھزاب کتگ بلوچ مات، گُوھار ءُ کسانیں زھگ ، پیر ءُ کماش دُرس اے زورگریں زوراک ءَ ارسیگ کتگ انت بلوچستان ءِ ھمک دگ ءُ کشک بلوچ مات ءُ گُوھارانی ارساں میچلینتگ انت شال ءِ برپیں بالاد بہ بیت یا کیچ ءُ گوادر ءِ چار راہ بہ بنت ھمک روچ بلوچ مات ءُ گْوھار گوں ارسیگیں چماں وتی زندانیگیں مھروانانی ودار ءَ نشتگ انت۔
“چم پہ تئی دیدارے اُمیت ءَ”
“آپ بواناں سھت ءُ دمان “
بلوچستان ءَ ھزارانی کساس ءَ زورگریں زوراک ءَ بلوچ ورناہ ءُ نودربر ھوار جتگ ءُ وتی زندان ءَ بندیگ کتگ انت سالانی سال گوز انت بلے آھانی ھچ ھال نیست اے بندیگیں بلوچ بچانی واستا آھانی مات گْوھار سک باز درد ءُ دورانی آماچ انت ءُ ودارے آس ءَ ھمک روچ سُچان انت چہ ھمے بندیگیں ورنایاں یکے ازیم دوست انت ازیم دوست 3 جولائی 2015 ءَ زورگریں استانی لشکر ءَ چہ گوادر ءَ زورآنسری آوار جتگ ءُ بیگواہ کتگ کہ روچے مروچی ھچ ھالے نیست۔
ازیم دوست ءِ گْوھار ماھین بلوچ ءُ رُکسانہ بلوچ پہ آئی ءِ زندان ءَ چہ آجو کنگ ءِ واستا ھمک وڑیں جھد کنگ ءَ انت ھمک روچ زھرشانی کنگ ءَ انت ءُ کشک ءُ دگانی سر ءَ گوں ازیم دوست ءِ اکس ءَ نشتگ انت بلے اے زورگریں زوراک ءِ گوش ءَ مورے ھم نہ وارت۔
ازیم دوست ءِ گُوھارانی پریات ءُ زاراں بگندے آزمان سر ءَ زُرتگ ماھین بلوچ ءِ ارسیگیں چم چنچو درد ءُ تورشت درانگاز کن انت اے درد گوں لبزاں درشان کنگ نہ بنت ازیم دوست ءِ بیگواھی ءَ پد آئی ءِ کھول ءِ مردماں ھچ وڑیں وشی ندیستگ زندے دُراھیں وشیں ساھت گوں ارسیگیں چماں گوز انت۔
ازیم دوست ءِ گْوھار گُش ایت کہ من مجگی نادُراہ جوڑ بوتگ اوں من نزاناں چے بکناں ءُ کجا بُرواں وتئی برات ءَ شوھاز بکناں اے تھنا ازیم دوست ءِ گِس ءِ کسہ نہ انت بلکیں بلوچستان ءِ ھمک گِس ھمے بزگی ءُ بیوسی ئےآماچ انت۔
کس نزانت مئے بندیگیں برات زورگریں استانی لشکر ءِ زندان ءَ چے ھال ءَ انت-
ازیم دوست ءِ پیریں مات ءَ وتی چم دروازگ ءَ سک داتگ انت نشتگ ھمے امیت ءَ کہ ازیم جان واتر کنت ءُ من امبازے کناں اے کرنی ئیں ودارے آس ءَ توساں بلے ھشت سال گوستگ انگت اے مات ءِ ودار آسر نہ انت ءُ انگت اے مات ءِ چم راھسراں ایر انت۔
نزاناں کدی اے زوراکیں وھد بلوچ گُلزمین ءِ سر ءَ آسر بیت ءُ بلوچ راج یک وش ءُ ایمنیں ساھے وتی گُلزمین ءِ سر ءَ کش ایت۔
دُوا انت کہ ازیم دوست ءَ ھوار دُرسیں زندانیگیں برات چہ زندان ءَ آجو باتاں پہ سلامتی واتر باتاں۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔