شال: پوجی پانگسے ءِ سر ءَ اُرش، چار مردم زدگ، زمہ واری بی ایل اے ءَ من اتگ

سربوتگیں ھالانی رِد ءَ بلوچستان ءِ بنجاھی شھر شال ءَ پوجی پانگسے ءِ سر ءَ بوتگیں اُرش ءَ چار مردم زدگ بوتگ انت-

پولیس ءِ رِد ءَ ناشناسیں مردمے ءَ دزبمبے چگل داتگ کہ پانگِس ءِ نزیک ءَ کپتگ ءُ ترّک اِتگ – وھدیکہ کہ تراک ءِ زد ءَ اتکگین دگہ چار مردم زدگ بوتگ انت –

پوجی کارمندانی مرگ ءُ زدگ بوگ ءِ ھال چہ واکدارانی نیمگ ءَ شنگ کنگ نہ بوتگ اَنت وھدیکہ ایندگہ زدگ بوتگیں مردمانی پجار خیر محمد، گل خان، صدرالدین ءُ زین الدین ناماں بوتگ انت –

پولیس ءِ رِد ءَ چہ تراک ءَ سریاب دگ ءِ سرجمیں دمگ جنزاِتگ، پولیس ءُ دمگی مردماں زدگ بوتگیں مردم سول ھسپتال شال ءَ سر کتگ انت –

دومی نیمگ ءَ بلوچ لبریشن آرمی ءِ جارکش ءَ اے اُرش ءِ زمہ واری من اتگ ءُ یک کارمندے ءِ کوش ءُ دو ءِ زدگ بیگ ءِ زمہ واری من اتگ اَنت-

بلوچ لبریشن آرمی ءِ جارکش جیئند بلوچ ءَ گوشتگ کہ مئے سرمچاراں شال ءِ دمگ سریاب دگ ءَ ڈگری کالج ءِ نزیک ءَ پوج ءِ پوسٹ ءِ سر ءَ دزبمبے چگل داتگ ءُ چریشی ءَ چہ یک کارمندے مرتگ ءُ دو زدگ بیتگ اَنت-