روکپتی بلوچستان: دزاپ ءَ نمیران بیتگیں مردمانی گائبانہ نماز جنازہ وانگ بیتگ

روکپتی بلوچستان ءِ دمگ دزاپ ءَ سِی ستمبر ءَ پیش اتکگیں وئیل ءَ بیران بیتگیں مردمانی غائبانہ نماز جنازہ وانگ بیتگ اَنت-

نماز جنازہ روکپتی بلوچستان ءِ بازیں شھراں وانگ بیتگ اشانی تہ ءَ گیشتر راسک گندگ ءَ اتکگ –

زاھدان ءَ ھواریں دمگ راسک ءَ قاسمی مسیت ءَ گوستگیں روچ ءَ زاھدان ءَ ایرانی گجر ءِ دست ءَ جنگ بیتگیں مردمانی گائبانہ نماز جنازہ وانگ بیتگ –

اود ءَ بازیں کچے ءَ مردماں بھر زرتگ ءُ رپتگینانی واستا دوا کرتگ ءُ آیانی کھولانی سبر ءُ اوپار ءِ واستا ھم دوا کنگ بیتگ اَنت –

زانگ بہ بیت سی ستمبر ءَ روکپتی بلوچستان ءَ یک ناوشیں زھرشانی ءَ چہ بے کساس ءَ مردم کُشگ بیتگ ات اَنت ءُ بازیں کچے ءَ مردم زدگ کنگ بیتگ اِت اَنت –

داں انگت ءَ نود ءُ پنچ مردم بیران بیتگ اَنت ءُ بازیں کچے ءَ زدگیں جاوراں گوں نادراھجاھانی تھتیگ اَنت –

ھالانی تہ ءَ گوشگ بیتگ کہ نادراھجاھاں تھتیگیں مردمانی جاور ھم بازیں کچے ءَ ناگیگ اَنت گمان ھمے بیت اِنت داں انگت ءَ بیرانیانی کچ گیش بیت کن اَنت-

روکپتی بلوچستان ءَ ایرانی سرکار اے وھد ءَ ایرادانی درچ ءَ اِنت ءُ کُشگ بیتگیں مردمانی واستا انساپ ءِ لوٹ ءُ آیانی ھون ءِ نھاد دیگ ءِ لوٹ ءَ کنگ ءَ اَنت-

گوستگیں روچ ءَ نیکراھی رھشون عبدالغفار ءَ ھم اے وئیل ایر جتگ ات ءُ آئی ءَ سرکار ءِ سر ءَ ایراد گپتگ اَت –

آئی ءَ گوشتگ ات کہ سرکار اے وڑیں زُلم ءُ زوراکی کنت بلے آ اے نزانت کہ اے زوراکیانی آسر چی بوت کن اَنت-