ایرانی رسانکدر وت ءَ راجی رسانکدر گشگ ءَ لج بہ کن اَنت – مولانا عبدالحمید اسماعیل زئی

زالمیں سرکار ءَ آئی ءِ واکدارانی کرد ءَ ڈیھ ھل ات نہ کنت اگاں اے زُلم برجاہ بیت اَنت گڑا ڈیھ ءِ جاور ناگیگ بنت اے گپانی درشانی مولانا عبدالحمید اسماعیل زئی ءَ ما آدینگ ءِ روچ ءَ امام جمعہ ءِ نماز ءِ وھد ءَ درشان کتگ اَنت-

روکپتی بلوچستان ءِ بنجاھی شھر زاھدان ءِ مزنیں مسیت ءِ پیشوک مولانا عبدالحمید ءَ گوستگیں روچ ءَ جمعہ ءِ نماز ءِ وھد ءَ تران کنان ءَ گوشتگ کہ ایران ءِ رسانکدر وت ءَ راجی رسانکدر گوشگ ءَ لَج بہ کن اَنت آئی ءَ گوشتگ کہ اے روچ ءَ زالماں زاھدان ءِ دلبند ءَ ھونریچی کتگ ءُ چریشی ءَ چہ بازیں مردم نمیران بیتگ اَنت-

آئی ءَ گوشتگ کہ سرکار ءُ آئی ءِ پارلیمنٹ پرست باید اے وئیل ءَ تچک ءُ ساپ ءُ پلگاری ءَ یک نیمگی ءَ چار ءُ ٹپاس ءَ بہ کن اَنت ءُ وئیل ءَ ھواریں مردم سزا دیگ بہ بنت-

آئی ءَ ایران ءَ چہ ڈنی رسانکدرانی منت گپتگ ءُ گوشتگ کہ آیاں اے ناوشیں وھداں اے جیڑہ دیم ءَ برتگ ءُ شریں رنگے ءَ زیردستانی گپ جھان ءَ سر کرتگ اَنت-

آئی ءَ گوشتگ کہ اے روچ یک سیاہ ءُ ھونی یے روچے ءِ بستار ءَ یاتگیری کنگ بیت اِنت ءُ اشی ءَ ما ھروھد ءَ یات کن ایں کہ اے روچ ءَ نمازی ءُ لس مردمانی گون ءَ چی کنگ بیتگ –

زانگ بہ بیت ارشد کشوری احمد وحیدی وزیر کشوری جمھوری اسلام ءَ گوشتگ ات کہ اے دزاپ ءِ وئیل ءَ ناشریں مردم ھوار اَنت چریشی ءَ پھزداراں وتی پھازگ ءَ گامگیج زرتگ ءُ آئی ءَ اے مردم ناشر گشتگ اَنت-