جعفر آباد: راشن ءِ بھر کنگ ءِ میان ءَ پولیس کارمندانی تیر گواری ءَ ورنایے بیران

بلوچستان ءِ دمگ جعفرآباد ءَ پولیس کارمنداں تیرگواری کُتگ ءُ یک ورنایے کُشتگ –

گیشیں ھالانی رِد ءَ جعفرآباد پولیس تھانہ کیٹل فارم ءِ نزیک ءَ پولیس ءَ تیرگواری کتگ ءُ راشن ءِ بھر گروکیں ورنایے کُشتگ –

اھوالکار ءِ رِد ءَ اے وئیل ھار آماچیں مھلوک ءَ راشن دیگ وھد ءَ بوتگ کہ اودا ایس ایچ او ءِ تیرگواری ءَ ورنایے زدگ کُتگ – زدگ بوتگیں ورنا ءَ نادراھجاہ ءَ برگ ءَ بوتگ انت کہ نیم راہ ءَ آئی ءَ دردانی ٹپ نہ سگ اِتگ ءُ بیران بوتگ –

وئیل ءِ بگیری ءَ دمگی مردم زھرشانی کنگ انت ءُ ایس ایچ او ءِ دزگیر کنگ ءِ لوٹ ءَ کنگ ءَ انت –

بلے تنی وھدی سرکار نیمگ ءَ اے درگت ءَ ھچ وڑیں درشان شنگ نہ بوتگ –