نور سلام نور نمیران اِنت – شیردل بلوچ

نبشتانک: نور سلام نور نمیران انت

نبشتہ کار: شیردل بلوچ

دی بلوچستان پوسٹ

نور سلام نور گوش اِیت

“من گنوک آں پہ آئی ءَ کہ ھیالاں در نہ بیت “
“بے وپایے روت تاں سال ءَ پد ءَ واتر نہ بیت “

ند زُرتگ ءُ انچیں کسے ءِ بابت ءَ جیڑ اِتگ ، منی زانگ ءَ آئی ءِ کوھیں بالاد باز ٹوہ گندگ کیت ، آ انچیں کارستے ءِ ھدابندے ءُ ھملی(عملی) انسانے ءُ سرجمیں آشوبی یے بوتگ، من ھزار رند ءَ جیڑ اِتگ، آئی ءِ بابت ءَ چیزے بہ نبیساں، بلے آئی ءِ ساڑایگ گرانیں کاراں چہ یکے شمار بیت، لبزانک ءِ پڑ ءَ سکیں بلاھیں نام ئِے بیتگ ئِے ءُ شائرانی لڑ ءَ یک مزنیں کردے ءِ واھند بیتگ ءُ چہ کیچ ءِ شائراں یک جوانیں شائرے زانگ بیت ،کہ ” نور سلام نور انت، من پھلی لوٹاں کہ ترا من نہ ونتگ ءُ سرپد نہ بوتگ آں- شھید نور سلام نور بلوچ راج ءِ بھادریں پُسگے ءُ لائکیں جھدکارے بوتگ ءُ اَنچو لبزانک ءِ پڑ ءَ پہ زبان ءِ دیمروئی ءَ ھم ھمکوپگ بوتگ، ءُ شَرّیں شائرے ءِ نام ءَ پجاہ آرگ بیت، منی نزّ ءَ لبزانک ءِ پڑ ءَ یک وٹساپ دیوانے ءَ ھواریں باسکے بوتگ ءُ آئی ءِ نبشتہ ءُ شائری من دیستگ بلے سدک نہ بیتگ آن ءُ چوں نہ زانتگ کہ نور سلام نور راج ءِ بھادریں سرمچارے-

اَنچش شھید شیھو جان ءُ شھید کامریڈ میراس جان ءَ گوں ھما وھد ءَ ھال کنگ نہ بوت تا چہ ما جتا کنگ بوت اَنت، رند ءَ دل ءَ ھمے ارمان پشت کپت ، شیھوجان ءُ کامریڈ میراس ءَ را من زانتگ اَت کہ سرمچار اَنت ،گوں ھمے ھر سئیں سنگتاں ھال ءُ اھوال بُہ کتین دگہ دل ارمانیگ نہ بیتگ اَت گوں ایشاں جوانی نزیکی یے بیتگ اَت بس وھد ءَ موہ نہ دات، کہ من گوں راجدوستیں سنگتاں جوانی ءَ ھال بہ کناں ناسرپدیں دل ءَ انگت دگہ، انچیں ھزار ارمان ھست کہ ،انچش ناسرجم اَنت، انچیں وھدے اَتکگ گیشیں ھوار بوگ پہ دومیگ ءِ واست ءَ جنجال ودّیگ بیت کنت ، پمیشکا دل میار کنت ءُ سُبکیں مھر پہ وت ءَ شات نہ بیت، بے بروسائیں زمانگ ءِ تُرس ءَ-

شھید ڈاکٹر منان جان ءَ گوشت’ ما سنگتاں گوش ایں، شما راز دار بہ بہ اِت، گڑا آ پد ءَ ھرچ گپّ ءَ را گُپت کن اَنت، لھتیں چَیز اَنت گُپت کنگی نہ اَنت‘لھتیں کنگی اَنت ءُ آیانی پَرک گیشنگی اَنت ،نکس ءُ نپ زانگ لوٹ اَنت ‘-

اگاں کسے ءَ چہ وتی ھمکاریں مردماں وت ءَ را گُپت بہ کنت گڑا یکے دومی ءَ چہ کمک زورگ نہ بیت، ھمے رنگ ءَ شیھو جان، شھید کامریڈ میراس ءُ شھید نور سلام نور ءِ ھال ءُ اھوال نہ کنگ ءِ درد ماں دل ءَ پیچ وران اَنت، باز ارمان بیت، گیرکاینت، انچیں نوبت کاینت وت ءَ را وت جُست ءُ پسہ کناں، پرچا گوں اِش ھال نہ کرتگ اے منی وتی نزوری یے یا چاگرد ءِ رودینتگیں نادراھی یے بژن بیت دَھر ءِ بے سَریں دور ءَ یا بے بروسائیں زمانگ ءِ تُرس ءَ دل ءَ جاگہ کرتگ۔

گْوَستگیں لھتیں ماھاں چہ ھر وھد ءَ پیس بک ءَ چاراں گڑا الم نور سلام نور ءِ شائری ءُ گُشندھی ءِ وش الھانیں” توار گوشاں کپ اِیت ءُ من باز ارمانیگ باں جیڑاں پرچا گوں آئی ءَ ھال کنگ نہ بوتگ، اگاں بہ لوٹ اتیں پہ ارزانی ءَ ھال کرتگ اَت ، اے ھم گنج اَت کہ زندگ اَت گپّ ئِے تواربند ءِ دروشم ءَ اش کتگ اَت ءُ آئی ءِ بے دروریں شَائری، وانتگ، شائری ءَ من ءَ وتی نیمگ ءَ باز کش اِتگ ،وھدے کہ شھید بوت پد ءَ تیوگیں کارست ئِے دیم ءَ میلانک بوت اَنت، آ یک ٹوھیں ھستی یے اَت۔

نور سلام نور ھما نام ءُ کارست ءِ ھدابند اَت کہ کوہ ءُ کوچگ ءِ ھواری ءَ گیدی ءِ ھمُک کنڈان زانگ بیت، آئی ءِ کارست آئی ءِ بالاد ءِ چیدگ ءَ پیش دارگ ءَ اِنت، ساڑایگ ءِ ھچ ھاجت ئِے نیست، نیکہ پہ چُشیں نزوریں گال ءُ گپتاراں آئی ءِ ستا بوت کنت، آئی ءِ ستا راج ءِ مزن نامیں رھشون ” واجہ گلزار امام ءَ ، آئی ءِ شھیدی ءَ رند کرتگ اَت، وتی گوھریں دانک نبشتھی دروشم ءَ شنگ ءُ تالاں ئِے کرتگ اِت اَنت، نور سلام نور ءِ زانت ءُ دلیری، راج ءِ دیم ءَ پدر ءُ رژنا اِنت-

نور سلام نور ءِ کارستانی سر ءَ نبیسگ ءُ گال ءِ کمایگ، انچو اَرزان نہ اِنت، آ زانت ءُ دلیری ءِ مزن شانیں کارستے ءُ آئی ءِ کسہ ماں راجدپتر ءَ الم دست کپ ایت، پہ راج ءَ دیمھونی دیوکیں سر ءُ سنگتاں وتی سدّکُیں ھمراہ گام پہ گام ءَ گیر کاینت۔

نور سلام نور ھوار گوں پنچ سنگتاں شانزدہ ،اُستپان، دو ھزار بیست ءُ دو (16/2/2022) ءَ تمپ کُلبر ءِ کوھی دمگ ءَ گوں اِستان ءِ لگوریں پوج ءُ آئی ءِ بالگردان دیم پہ دیمی جنگ ءَ میڈ دیگ پد گوں وتی ھمرایاں پہ وتن نمیران بنت سرڈگار ءِ شھیداناں سھرچکیں دروت ندر کناں ۔

آجوئی زندگ بات

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔