بلوچستان: تیرگواری ءِ وئیل ءَ دو زالبولاں ھوار سَے مردم بیران بوتگ انت

بلوچستان ءِ جتا جتائیں ھند ءُ دمگاں تیر گواری ءِ وئیلاں دو زالبول کُشگ بوتگ انت وھدیکہ شال ءَ زھگے ءَ وتی پت کُشتگ –

گیشیں ھالانی رِد ءَ گوستگیں روچ ءَ شال ءِ دمگ شاہ زمان دگ ءَ لوگواجہ ءَ وتی گِس ءَ پُترتگ ءُ وتی لوگی تیر باران کُتگ کُشتگ ءُ وت تتکگ – واکدارانی رِد ءَ کوش ءِ سوب لوگی جیڑھے بوتگ –

دومی نیمگ ءَ بلوچستان ءِ دمگ کلات ءَ محمد رمضان نامی مردمے ءَ زالبول ءِ تیرباران کتگ ءُ وت تتکگ –

وئیل ءِ ھال ءِ سربوگ ءَ پولیس ءَ وت ءَ وئیل جاہ ءَ سر کتگ ءُ زالبول ءِ جون نادراھجاہ ءَ برتگ اودا اژدری چار ٹپاس ءَ پد جون کھول ءِ دست داتگ –

کلات ءَبوتگیں وئیل ءِ درگت ءَ تنی وھدی ھچ وڈیں ھال نہ اتکگ کہ کجام سوب ءَ اے مرد ءَ زالبول جتگ –

زانگ بہ بیت بلوچستان ءَ لوگی جیڑہ ءُ گیرت ءِ نام ءَ زالبولانی کوش ءِ وئیل ھمگ روچ بوگ ءَ انت وھدیکہ اے وئیل ءَ ھواریں مردم باز کمے کساس ءَ قانود ءِ دیم ءَ آرگ بنت –

کچ ءُ کساس ءِ رِد ءِ رِد ءَ پاکستان ءِ تہ ءَ ھمک سال ءَ ھزار ءَ گیش زالبول کُشگ بیت اِنت کہ آھانی تہ ءَ گیشتر گیرت ءِ نام ءَ کُشگ بنت –

دومی نیمگ ءَ اے ھم ھال آیگ انت کہ خروٹ آباد ءَ سعیدالرحمان ء حاجی محمد حسن ءَ وتی پت تیر باران کُتگ کُشتگ – پولیس ءَ کتکار دزگیر کُتگ –