بلوچستان ءَ سُھرک ءِ نادراھی ءَ دگہ سَے زھگ بیران

بلوچستان ءِ جتائیں ھند ءُ دمگاں سھرک ءِ نادراھی ءَ سَے زھگ بیران بوتگ انت –

گیشیں ھالانی رِد ءَ لورلائی ءَ سھرک ءِ نادراھی ءِ تہ ءَ گیشی اتکگ بازیں زھگے نادراھی ءِ آماچ بوان انت، لورلائی ءَ گرمی ءُ بازیں دمگاں سھرک ءِ نادراھی ءَ آماچ بوتگیں سَے زھگ بیران بوتگ انت وھدیکہ دگہ بازیں زھگے سھرک ءِ نادراھی ءِ آماچ انت –

لورلائی ءِ دمگی مردماں چہ جانسلامتی ءِ واکداراں لوٹ کتگ سھرک ءِ نادراھی گر ءُ دار ھاتر ءَ ایمرجنسی ٹولی اڈ بہ دنت ءُ اے نادراھی ءِ گرءُ دار ءِ ھاتر ءَ گامگیج زورگ بہ بیت –

بلوچستان ءَ جانسلامتی ءِ آسراتی نہ بوگ ءِ سوب ءَ چہ سھرک نادراھی ءَ زھگانی بیرانی ءِ تہ ءَ سک باز گیشی اتکگ سُھرک ءِ نادراھی ءِ سوب ءَ تنی وھدی بلوچستان ءِ ایندگہ دمگاں ھوار نصیرآباد لڑ ءِ تہ ءَ اولی لمبر انت –

زانگ بہ بیت گوست ءَ بلوچستان ءِ بازیں دمگاں سُھرک ءِ نادراھی ءِ ھال اتکگ انت کہ آھانی تہ ءَ زھگ مزنیں کچے ءَ نادراھی ءِ آماچ انت – وھدیکہ اے نادراھی یک برے تالان بوت گڈا ترندیں اینٹی بائیوٹیک درمان دیگے ءَ پد اے نادراھی ءِ گر ءُ دار بوت کنت ءُ درمانانی کورس سرجم کنگ ءَ پد ھلاس بیت اِنت –

چاگردی مردمانی گوشگ انت کہ بلوچستان ءَ جانسلامتی ءِ آسراتی نیستی ءِ ھساب انت وھدیکہ دگہ ملکاں اشی ءِ ارزانی ءَ الاج بیت اِنت بلے بلوچستان ءَ اے وڈیں نادرھانی زھگاں مرگ ءِ دیمپان کنگ ءَ انت –