شال ءُ تربت ءَ دست کپتگیں جونانی چار ءُ ٹپاس کنگ بہ بیت اِنت – وی بی ایم پی

بلوچستان ءِ بنجاھی شھر شال ءَ پریس کلب ءِ دیم ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی برجاہ،  زھرشانیءَ مروچی چار ھزار ءُ ھپسد ءُ ھپتاد ءُ ھشت روچ سرجم بوتگ انت- 

ھمے وھد ءَ حسن مینگل ایڈوکیٹ، رضا آفریدی ایڈوکیٹ، ترین اتحاد ءِ سرکماش ملک عبیداللہ ءُ دگہ مردماں بنجل ءَ اتکگ ءُ دلپدردی درشاناِتگ- 

گل ءِ کمک سرکماش ماما قدیر بلوچ ءَ گوشتگ کہ بلوچستان ءَ انسانی ھکانی لگتمالی میان استمان ءِ رھبندانی بگیری انت کہ گل ھمے میاناستمانی ادارھے کانودانی رِد ءَ بلوچ راج ءِ پجار ءُ زورانسری آوار جنگ بوتگیں پرزندانی ھاتر ءَ پُرایمنیں جھد کنگ ءَ انت- 

وائس فار بلوچ مسنگ پرسنز ءَ وتی شنگ کرتگیں درشان ءِ تہ ءَ گوشتگ کہ چہ تربت ءُ یکے ءُ شال ءِ دمگ نوحصار ءَ دو ژانگولیں جونانی دستکپگ پدردی انت- 

گل ءَ چہ سرکار ءَ لوٹ کتگ کہ جونانی دست کپگے بگیری ءَ گامگیج بہ زوریت ءُ وئیل ءِ پٹ پول ءَ بہ کنت ءُ جونانی پجار ءَ بہ کنت پرچاکہژانگولیں جونانی دست کپگ ءِ سوب ءَ بیگواھیں مردمانی کھول بازیں ماژگی ازاب ءِ تہ ءَ انت کہ اے آھانی بیگواھیں دوستیگیں مردمانی جون مہبنت – پرچاکہ بلوچستان ءَ پیش ءَ ھم ژانگولیں جون دست کپتگ انت کہ آھانی پجار کنگ بوتگ ءُ آھانی تہ ءَ گیشتریں مردم پیش ءَ زورانسریآوار جنگ ءُ بیگواہ کنگ بوتگیں مردم بوتگ انت-