بلوچستان شھدربرجاہ ءَ نودربرانی زھرشانی، درنگاز کنوکانی سر ءَ لٹ شاپ

بلوچستان شھدربرجاہ ءَ بے رھبندیانی بگیری ءَ نودربرگلاں زھرشانی کتگ ءُ زھرشانی ءِ میان ءَ پولیس ءَ نودربرانی سر ءَ لٹ شاپ کتگ وھدیکہ بازیں نودربرے دزگیر کتگ ءُ گوں وت برتگ انت –

نودربر بلوچستان شھدربرجاہ ءَ داخلہ ٹیسٹانی بے رھبندی ءِ بگیری ءَ وتی زھرشانی ءَ کنگ ءَ بوتگ انت کہ واکداراں پولیس ءُ ایف سی شھدربرجاہ ءِ تہ ءَ لوٹارینتگ انت ءُ نودربرانی سر ءَ زوراکی کتگ –

درنگاز کنوکانی گوشگ ات کہ شھدربرجاہ ءِ تہ ءَ پروفیشنل ءُ نان پروفیشنل ڈیپارٹمنٹ یک انٹری ٹیسٹ ءِ کنگ بوتگ یکے ءَ گیش ڈیپارٹمنٹاں داخلہ زوروکیں نودربر نوکیں پالیسی ءِ رِد ءَ بس یکیں ڈیپارٹمنٹ ءَ داخلہ زرت کن انت –

بلوچستان شھدربرجاہ ءِ تہ ءَ نودربرانی سر ءَ بوتگیں لٹ شاپی ءِ بگیری ءَ نودربراں سریاب دگ ءِ سر ءَ نندانک جتگ – نودربرانی گوشگ انت کہ پولیس ءَ بازیں نودربرے دزگیر کتگ انت –

درنگاز کنوکیں نودربرانی گوشگ انت کہ شھدربرجاہ ءِ چانسلر ءِ گوشگ ءِ پد ءَ نودربرانی سر ءَ لٹ شاپی بوگ ءَ انت اگاں مئے سنگت یل کنگ نہ بوتاں گڈا نودربر وتی نندانک ءَ برجاہ دار انت –

آھانی گوشگ انت کہ وائس چانسلر بلوچستان شھدبرجاہ ءِ جیڑھاں سنجیدگ نہ انت نودربر لاچار بوتگ انت کہ سریاب دگ ءِ بند کتگ اے جاورانی پژدر ءَ بلوچستان شھدربر جاہ ءَ مزنین کچے ءَ ایف سی آرگ بوتگ –