شبیر بلوچ ءِ زورانسری آوار جنی ءِ بگیری ءَ روانک ءِ کشگ بیت اِنت – سیما بلوچ

زورانسری آوار جنگ بوتگیں نودربر رھشون شبیر بلوچ ءِ گھار ءَ رسانکدراں وتی شنگ کرتگیں درشان ءِ تہ ءَ گوشتگ کہ منی برات چار اکتوبر سال دوھزار شانزدہ ءَ تربت ءِ دمگ گورکوپ ءَ آئی ءِ لوگبانک ءِ چمانی دیم ءَ دگہ بیست مردمانی ھمراھی ءَ پاکستانی پوج ءَ زورانسری آوار جتگ ءُ بیگواہ کتگ، پدا رند ءَ ایندگہ مردم یل کنگ بوتگ انت بلے شش سالانی گوزگ ءَ پد ھم شبیر بلوچ بیگواہ انت ءُ مئے کھول آئی ءِ وش سلامتی ءِ ھچ وڈیں ھال سر نہ بوتگ –

شبیر بلوچ ءِ گھار سیما بلوچ ءُ کھول ءُ مردماں جار جتگ کہ شبیر بلوچ ءِ زورانسری آوار جنی ءَ شش سال سرجم بوگ ءَ انت آئی ءِ زورانسری آوار جنی ءُ یل کنگ ءِ ھاتر ءَ چار اکتوبر دوھزار بیست ءُ دو ءَ بلوچستان ءِ باپاری شھر ھب چوکی ءَ ایمنیں زھرشانی ءِ کنگ بیت اِنت – زھرشانی روانک بیگاھے ادار سَے ءَ لسبیلہ پریس کلب ءِ دیم ءَ در کئیت ءُ ھب ءِ جتائیں دگانی سرا گام جنان ءَ پد واتر لسبیلہ پریس کلب ءَ دیم ءَ کئیت مچی دروشم ءَ زھرشانی کنگ بیت انت –

سیما بلوچ ءَ گوشتگ کہ آئی ءَ وتی برات ءِ یل کنائینگے ھاتر ءَ ھر وڈیں جھد کتگ، ھر ھما جاہ ءَ آئی ءَ امیت ءِ دیستگ ھما در ٹُک اِتگ ءُ پریات کتگ، سال دوھزار ھژدہ ءَ بلوچستان ءِ وزیر داخلہ ضیا لانگو ءَ مارا باور کنائینتگ چہ آئی ءَ پد گوستگیں سال ءَ اسلام آباد ءَ مزن وزیر عمران خان ھم دچار کپتگ آئی ءَ ھم شبیر ءِ یل کنگے کول کتگ ءُ گوستگیں ماہ ءَ شال ریڈزون ءَ گورنر کارگس ءِ دیم ءَ پنجاھ روچانی زھرشانی ءَ پد وفاقی کمیٹی ءَ مارا باور کنائینتگ کہ مئے دوستیگیں مردم یل کنگ بنت بلے شبیر بلوچ ھنگت یل کنگ نہ بوتگ –

شبیر بلوچ ءِ کھول ءِ ھب ءِ درسیں انسان دوست ءُ ھر تک ءُ پھناتاں سیادی داروکیں مردماں گوں لوٹ کتگ کہ چار اکتوبر ءِ زھرشانی روانک ءَ بھر بہ زور انت ءُ اے ھم گوشتگ کہ ھمے روچ ءَ چاگردی ترامجاھاں ھیش ٹیگ # SaveShabirBaloch ءِ نام ءَ کمپئین بیگاھے شش ءَ بگر تاں دوازدہ بج ءَ چلائینگ بیت اِنت اشی ءِ تہ ءَ بھر بہ زور ایت مئےتوار جوڈ بہ بہ ایت –