شال ءَ ورنایے زورانسری آوار جنی ءَ پد بیگواہ

بلوچستان ءَ زورانسری آوار جنیانی درچ یکشل ءَ برجاہ انت – گوستگیں روچاں بلوچستان ءِ جتا جتائیں ھند ءُ دمگاں دو مردم یل کنگ بوتگ پدا دوسری مردمانی زورنسری آوار جنی ءِ ھال ھم اتکگ انت –

ھزدار ءُ نوشکی ءَ پد چہ شال ءَ ھم یک ورنایے زورانسری آوار جنی ءِ ھال انت –

ٹی بی پی ءَ سربوتگیں ھالانی رِد ءَ بیست ھپت ستمبر شپ ءَ پوج ءَ سبزل دگ کلی بنگلزئی ءَ گِس ءِ سر ءَ بیڑ برتگ ءُ برکت ء محمد عارف بنگلزئی زورانسری آوار جتگ ءُ بیگواہ کتگ کہ ھما انت آئی ءِ ھچ ھال اھوال نیست –

دمگی مردمانی گوشگ انت کہ پاکستانی پوج فرنٹیئر کور ءُ لس پوشاک گوریں کارمنداں مزنیں کچ ءَ دمگ وتی انگیر ءَ کتگ ءُ اے ورنا آوار جتگ ءُ گوں وت برتگ –

زانگ بہ بیت گوستگیں روچاں بیگواھیں بلوچانی کھولاں وفاقی وزیر رانا ثناء اللہ ءِ باور کنائینگ ءَ پد شال ریڈزون ءَ وتی نندانک ھلاس کہ اود ءَ کمیٹی ءَ درنگاز کنوک باور کنائینتگ انت کہ زورانسری آوار ءِ گر ءُ دار ءِ ھاتر ءَ گامگیج زورگ بیت اِنت وھدیکہ بیگواھیں مردمانی کھول ءِ نیمگ ءَ دیگ بوتگیں بیگواھیں مردمانی لڑ ءِ تہ ءِ مردم یل کنگ بنت –

اے لڑ ءِ تہ ءِ تنی وھدی یک مردمےھم یل کنگ نہ بوتگ ءُ ناکہ زورانسری اوار جنی ءِ گرءُدار ءِ ھاتر ءَ گامگیج زورگ بوگ ءَ انت –