کندھار: بلوچ پناھگزینانی سر ءَ اُرش ءِ جھد، دو پاکستانی کارندہ دزگیر

چہ بلوچستان ءِ جتا جتائیں جاھاں پاکستانی زُلم ءُ زوراکیانی پژدر ءَ اے وھد ءَ ھزارانی کچ ءَ بلوچ پناھگزینی زند ءِ گوازینگ ءَ اوگانستان ءَ لاچار اَنت- کہ اشانی سر ءَ ھمک وھد ءَ اُرش بنت ءُ بازیں وھداں چہ بلوچ پناہگزین جنگ بیتگ اَنت – اے اُرشانی بھتاماں بلوچ ءُ پشتون پاکستانی چیریں ادارھانی سر ءَ جنگ ءَ اَنت-

نوکتریں ھالانی رد ءَ اوگانستان ءِ زرباری اُستان کندھار ءَ طالبان سرکار ءِ کارندھاں دو شکی ئیں مردم دزگیر کرتگ اَنت کہ بلوچ پناھگزینانی لوگاں شتگ ءُ وت ءَ را طالبان گشتگ-

سرکاری یک کارندھے ءَ دو مردمانی دزگیر کنگ ءِ ھال راست کرتگ ءُ گوشتگ جرمکاراں جست ءُ پرس ءِ وھد ءَ پدر بیتگ کہ اشاں پاکستانی چیریں ادارھانی نیمگ ءَ بازیں لاچ ءُ زرے دیگ بیتگ شما بلوچ پناھگزیناں نشانگ بہ کن ات اشانی ھوار ءَ پاکستانی قونصل ھانہ ءَ ھم اے گپ پدر کرتگ آئی ءَ لوگانی نشانی داتگ اَنت-

زانگ بہ بیت اوگانستان ءَ بلوچ پھنتانی اُستان نیمروز ءَ یک ماھے ءَ پیسر بلوچ پناھگزینے لوگ ءِ دیم ءَ تیرانی نشانگ کرتگ ءُ کشتگ ات –

ھمے وڑ گوستگیں ماہ ءَ اسپین بولدک ءَ طالبان ءِ کارندھاں پاکستانی چیریں ادارھاں گوں بندوکیں یک پنچ باسکی ٹولی یے دزگیر کرتگ ات کہ آئی ءَ چمن ءَ ھیلکاری زرتگ ءَ بلوچ پناھگزین وتی نشانگ ءِ تہ ءَ کرتگ اَنت-