چہ بلوچستان ءَ توپان ءَ ھپسد ءَ گیش جانسلامتی ءِ بنجل نیست ءُ نابودی ءِ آماچ

بلوچستان ءَ ھئور ءُ ھارارانی سوب ءَ گوستگیں یک ماھے ءِ میان ءَ ھپسد ءَ گیش جانسلامتی ءِ بنجل ءُ رورل ہیلتھ سینٹراں تاوانبار بوتگ انت –

جانسلامتی ءِ واکدارانی رپورٹ ءِ رِد ءَ توپان ءَ بلوچستان ءِ جتاجتائیں دمگاں بازیں جانسلامتی ءِ بنجل تاوان داتگ انت بازیں بنجلے ھچ دردیگ نہ انت چریشی ءَ بلوچستان ءِ بیست ءُ شش ھار آماچیں دمگاں جانسلامتی ءِ کار نیست ءُ نابودی ءِ آماچ بوتگ انت-

توپان ءَ پد ھار آماچیں دمگان بازیں نادراھی ءِ تالان بوتگ نادراھانی کچ روچ پہ روچ گیش بوان انت ھاسکر ملیریا، ڈائریا، گیسٹر ءُ دل ءُ لاپ نادراہ گیش بوان انت اے دابیں ھزاراں کیس بس نصیرآباد ءَ رپورٹ بوتگ انت- میان استمانی جانسلامتی ءِ ادارہ ڈبلیو ایچ او ءِ کارمند ءَ آنلائن رسانکدرے ءَ گوں ھال کنان ءَ گوشتگ کہ کمک کاراں چیزانی کمی ءُ تباہ بوتگیں جانسلامتی بنجلانی سوب ءَ اے دمگاں نادراھانی الاج ءَ بازیں دلسیاھی دیمپانی کنگ کپگ ءَ انت –

جانسلامتی ءِ واکدارانی رِد ءَ اے جاورھالاں ھارآماچیں مردمانی اڑ ءُ جنجال گیش کتگ انت – بلوچستان ءَ پیسر ءَ جانسلامتی ءِ ھر وڑیں چیز نیستی ءِ ھساب ءَ بوتگ سرکار ءَ مدام دلگوش نہ داتگ بلوچستان ءَ دیریں دمگاں جاور گنتر انت –

اے توپان ءَ سرجمیں بلوچستان ءِ جانسلامتی ءِ نزام درگان درگان کتگ ھاسکر لسبیلہ، جعفرآباد، پشین، نصیر آباد، قلعہ عبداللہ ءُ کوھلو ءَ جانسلامتی ءِ بنجل بی ایچ یو ایس ءُ ریجنل ہیلتھ یونٹس ھوار توپان ءَ ھپسد جانسلامتی ءِ بنجل تاوان داتگ انت کہ آھانی تہ ءَ دو سد ءُ ھپتاد ءُ ھشت سرجمی ءَ تباہ بوتگ انت –

جاسلامتی ءِ واکدارانی رِد ءَ ھارآماچیں دمگاں مردمانی الاج ءِ ھاتر ءَ سرکار ءَ دلگوش دیگی انت، ملیریا کیسانی تہ ءَ روچ پہ روچ گیشی آیان انت سرکار ءَ لوٹ ایت اشی ءِ گر ءُ دار ءَ زوتاں زوت گامگیج بہ زور ایت اگاں نان جاور نگیگ تر بنت –

زانگ بہ بیت ھئور ھاراں بلوچستان ءِ سرجمی ءَ سِی ءُ پنچ دمگ سانمند بوتگ انت ھئور ءُ ھاراں سَے سد ءُ بیست ءُ سَے مردم بیران بوتگ انت وھدیکہ اے دمگاں وبائی نادراھی تالان بوتگ ھپتگے ءِ میان ءَ ڈائریا، دل ءُ لاپ، ملیریا، چم ءُ پوست ءِ انفیکشن ءُ دم ءِ نادراھاں ھوار دگہ نادراھانی سِی ءُ ھشت ھزار کیس رپورٹ بوتگ انت –

یک دگہ رپورٹے ءِ رِد ءَ بلوچستان ءَ ھئور ءُ ھاراں یک نیمگے مھلوک ءَ جانی ءُ مالی تاوان رس اتگ ءُ دومی نیمگ ءَ وردنی سامان ھم نیستی ءِ ھساب ءَ انت بلوچستان ءَ ھئور ھاران پد بازیں دمگان وردنی ھچ وراک نیست چریشی ورگے کمی، نزوری زھگ ھون ءِ کمی ءِ ھم اماچ انت –

ھمے زوتاں بوتگیں ھئوراں اتکگین توپان ءِ سوب ءَ بلوچستان ءَ دوھزار ءُ ھشت سد ءُ پنجاہ ءُنھ وانگجاہ سانمند بوتگ انت بلوچستان ءِ دمگ لسبیلہ ءَ درساں گیش سَے سد ءُ بیست ءُ یک اسکول تباہ بوتگ انت –