شال ءَ بلوچ راجداریں باسکانی زورانسری آوار جنی ءِ بگیری ءَ زھرشانی برجاہ

بلوچستان ءِ بنجاھی شھر شال ءَ پریس کلب ءِ دیم ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار ءُ ھپسد ءُ ھپتاد ءُ یک روچ سرجم بوتگ انت – چہ پنجگور ءَ راجدار ءُ چاگردی باسک محمد آصف بلوچ، رسول بخش، درمحمد بلوچ ءَ ھوار دگہ مردماں بنجل ءَ اتکگ ءُ دلپدردی درشان اتگ –

ھمے وھد ءَ گل ءِ کمک سرکماش ماما قدیر بلوچ ءَ گوشتگ کہ وتگڑیں رھشون ءُ آھانی پاٹی ترس، وتگرزی سر ءَ جوڈ بوتگیں وتی راجکاری ءَ بلوچ پرزنداں زورانسری آوار جنی ءُ بیگواھی پدا آھانی ژانگولیں جونانی چگل دیگ ءَ پاکستانی پوج ءُ چیرہ ادارہ ءُ آھانی داشتگیں کشندہ ٹولیانی کمک کار جوڈ بوگ ءَ انت –

ماما قدیر ءَ گوشتگ کہ گوستانک بے رھم یے بازیں مردمے ءَ گوستانک ءَ وتی راجانی دلاری کتگ بلے آ کارمرز کنگ ءُ دور دیگ بوتگ انت – پرچاکہ یک مردمے ءِ مرگ راستی یے چہ اشی ءَ تچگ نہ بیت بلے ھو راجانی تہ ءَ نام کٹوکیں زانتکاریں مردمان دیمھونی داتگ وتی راج ءِ ھلاس بوگ ءُ نیست نابودی ءَ رکین اِتگ انت – بلوچ ءَ زندانی کنگ ءُ آئی ترسینگ ءِ شوربندی بوگ ءَ انت ھزارانی کچ ءَ بلوچ پرزند شھید کنگ ءُ آھانی ژانگولیں دست کپتگ انت ھزارانی کچ ءَ بلوچ پاکستانی پوج ءُ چیریں ادارھانی زنداناں بندیگ انت ءُ ازیت سگگ انت اے درسانی زمہ دار جی ایچ کیو ءَ نشتگیں ھما واکدارانی انت –

ماما قدیر بلوچ ءَ گوشتگ ھستیں وھد ءَ میان استمانی جاورھالاں کمو چارگ بہ بنت گڈا اے راستی ءِ منگ ءَ دیر نہ لگ ایت کہ دنیا تاکتور ءُ نزور یا تاکتور ءُ تاکت ءِ گرگے ھاتر ءَ جھد کنوکانی میان ءَ بھر انت – جھان ءِ تہ ءَ ھما راج پہ شرپ وتی ڈیھے تہ ءَ نشت کنت کہ تاکتورانی دیم ءَ گون پرایمنیں جھد ءَ داریت ءُ ھما راجانی باندات درگت ءَ کہ وتی جان ءِ رکینتگ گڈا پہ آئی ءَ چکچینی سوب جوڈ بیت – ھر ھما راج کہ دگہ ملک ءِ پوجانی ایردست انت ملٹی ڈائی مینشل جھد ھاتر ءَ شپ روچ گرانتر کنگ بنت – بلوچستان کہ ھپتاد ءُ دو سال انت پاکستانی پوج ءُ چیریں ادارھانی ایردست انت –