ایران ءَ زھرشانی ءِ وھد ءَ بیران بیتگیں مردمانی کچ پنجاہ ءَ سر بیتگ اَنت، سرکار ءِ پلامرزی کنوک دگانی سر ءَ دراتکگ اَنت

ایران ءَ یک نیمگے ءَ کردیں زالبول مھسا امینی ءِ کوش ءِ ھلاپ ءَ زھرشانیانی درچ برجاہ اَنت دومی نیمگ ءَ سرکار ءِ پلامرزی ءَ ھزارانی کچ ءَ مھلوک دگانی سر ءَ اتکگ اَنت-

فرانسیسی ھبررساں ایجنسی اے ایف پی ءِ رد ءَ آدینگ ءِ روچ ءَ تھران ءُ اھواز، اسپھان، قم ءُ تبریز ءَ ھوار دگہ شھراں سرکار ءِ پلامرزی ءَ پسھی روانکاں ھزارانی کچ ءَ مردماں برکہ ءُ دودمان داریں گُد گورا کتگ پلامرزی ءَ دگانی سر ءَ اتکگ اَنت-

ایران ءِ مھر ھبر رساں ایجنسی ءَ گوشتگ نیکراھی ءِ ھلاپ ءَ پندل سازوک ءُ توھین کنگ ءِ وئیلانی ایر جنی ءَ ایرانی مھلوک ءِ مزن شانیں زھرشانی مروچی بیتگ-

سرکاری ٹیلی ویژن ءِ وسطی تھران ءَ برکہ کنوکیں بازیں مردینانی اکس شنگ کتگ اَنت ءُ اشانی ھواری ءَ زالبولاں ھم سیاھیں چادر پوش اتگ –

اوسلو ءَ برجم داشتگیں ھکانی ٹولی ھینگاو ءَ گوشتگ کہ گوریچانی شھر اوشناویہ ءَ سرجمیں شپ بیوکیں جنگ ءِ وھد ءَ سیکورٹی پورسز ےَ زھرشانی کنوکانی سر ءَ لس سلاھانی گون ءَ تیرگواری کرتگ بلے لس ھالانی تہ ءَ اشی ءِ راستی نہ بیتگ-

بابول آن لائن تالان کنوک ءَ بازیں تامر بند شنگ کتگ اَنت زھرشانی کنوکاں ایرانی سپریم لیڈر آیت اللہ علی خامنی ای ءِ اکسانی یک مزنیں بورڈے ماندارگ ءَ گندگ بیت اِنت-

اوسلو ءَ برجم دارگ بیتگیں یک گلے ایرانی ھیومن رائٹس ءَ گوشتگ سرکار ءِ ھلاپ ءَ بیوکیں زھرشانی کنوک سکیورٹی پورسز ءِ دست ءَ داں انگت ءَ کم چہ کم پنجاہ مردم بیران بیتگ اَنت-

ایرانی ھیومن رائٹس ءِ نوک شنگ کرتگیں درشان ءَ پنجاہ مردمانی شش ھما مردم ھوار اَنت پشمبے ءِ روچ ءَ چہ گوریچانی گیلان ءِ ھند ریزوانشاھر ءَ سکیورٹی پورسز ءِ تیرگواری ءَ بیران بیتگ اَنت دگہ بیرانیانی ھال بابول ءُ اموپ ءَ نبشتگ کتگ اَنت –

نیویارک ءَ ھستیں سینٹر فار ھیومن رائٹس ان ایران ءَ گوستگیں کچ ءُ کسانی رد ءَ بیران بیتگیں مردمانی کچ سِی ءُ شش کتگ اَنت-

دگانی سر ءَ لٹ ءُ کُٹانی بارو ءَ انٹر نیشنل ھیلتھ ریگولیشنز ءَ گوشتگ کہ ھشتاد میتگ ءُ شھراں اے زھرشانی شنگ ءُ تالان بیتگ بیست ءُ دو سالی ئیں مھسا امینی ءِ کوش ءَ پد بندات بیتگ-

ایرانی زھرشانی کنوکانی اجتماع ءِ دارگ ءِ پژدر ےَ اکس جھانی ڈیھاں سر بیگ ءَ انٹرنیٹ ءِ سر ءَ ترندیں بندش جنگ بیتگ اَنت-

امریکہ ءَ آدینگ ءِ روچ ءَ ھال شنگ کتگ ات آ انٹرنیٹ سروس ءِ گیش کنگ ءَ ایران ءَ گیشیں پابندیاں کم کنگ اِنت-

نائب وزیر ھزانہ والی اڈیمو ءَ گوشتگ نوکیں گامگیجاں ٹیکنالوجی کمپنیاں ایرانیانی واستا سر بیوکیں انٹرنیٹ ءِ کمک ءَ گیش کنگ ءِ اجازت ءَ دنت-

سکیورٹی پورسز ءَ ماجد تاواکولی ءَ ھوار بازیں باسک دزگیر کرتگ اَنت آ سال دوھزار ءُ نُھ ءِ گچینکاری ءِ اڑ ءُ جنجالاں پد گوستگیں بازیں سالاں وھد وھد ءِ سر ءَ دزگیر کنگ بیتگ اَنت-

ایرانی سرکاری نیوز ایجنسی ارنا ءِ رد ءَ زھرشانی کنوکاں سکیورٹی پورسز ءِ سر ءَ سِنگ جنگی کتگ ءُ پولیس ءِ گاڑی آس داتگ اَنت ءُ سرکار ءِ ھلاپ ءَ اوگام جتگ-

سینٹر فار ھیومن رائٹس ان ایران ءَ گوشتگ کہ چاگردی رسانکجاھاں شنگ بیتگیں تامراں گند بیت اِنت سرکار تچک ءَ گولہ بارود، پیلٹ گن ءُ آنسو گیساں گوں پسو دیگ اِنت –