روس ءِ نیمگ ءَ زورگری ءِ واستا یوکرین ءِ چار ھلکاں ریفرنڈم بندات بیتگ

روس ءِ زورگپتگیں یوکرین ءِ چار ھلکاں مروچی آدینگ ءِ روچ ءَ ریفرنڈم بیگ ءَ اِنت چریشی ءِ پژدر ءَ میان اُستمانی رھشوناں ایر جتگ ءُ اے گیر کنانونی زورانسری یے گوشتگ-

برطانوی ھبر رساں ایجنسی روئٹرز ءِ رد ءَ یوکرین ءُ آئی ءِ ھمسنتاں اے تچک کرتگ آ ایشی ءَ نہ من اَنت-

یوکرین ءِ اُستان پوھانسک،ڈونیٹسک، کھیرسن ءُ زاپوریزھیا ءَ کچ ءُ کساس یوکرین ءِ پانزدہ درسد جاھاں نمائندگی ءَ کنت اے گچینکاری آدینگ ءَ داں سَے شمبے ءَ برجاہ بیت اِنت –

ریفرنڈم ءِ سر ءَ ماسکو ءِ منوکانی نیمگ ءَ ھم ھروھد ءَ باوست بیتگ روس ءِ گوشگ اِنت اے دمگ مھلوک ءِ واستا وتی لیکہ ءُ ھیالانی درشانی اِنت –

روسی وزیر ھارجہ سرگئی لاوروف ءَ گوستگیں ھپتگ ءَ گوشتگ ات ’ بیڑ ءِ بندات ءَ اے دمگانی مردماں وتی بارو ءَ جوانیں شوربندی کنگی اَنت ءُ انیگیں جاورھال ھم اے گپ ءَ راست کن اَنت آ وتی بھت ءِ واھند وت بیگ لوٹ اَنت-

آئی ءَ گوشتگ کہ اے چاریں جاھاں روس ھوار کنگ ءَ ماسکو ءَ وتی سرزمین ءِ پھازگ ءِ واستا لشکریانی گیش کنگ ءِ منانک ءَ دیم ءَ آورت کنت-

سال دوھزار ءُ ھشت ءَ داں دوھزار ءُ دوازدہ ءَ روسی سروک دمتری میدویدیف ءَ ٹیلی گرام یَ وتی یک پوسٹے ءَ گوشتگ ’ روسی سرڈگار ءِ زورگری یک جرمے کہ اے درستیں واکاں دنت وتی پھریزگ ءَ درستیں تاکتاں کارمرز کنگ ءِ اجازت دنت ‘-

لوھانسگ ءِ دمگ ءِ گورنر سرھی گیدائی ءَ یوکرینی ٹی وی ءَ گوشتگ ’ اگاں اے درست روس ءِ دمگ گوشگ بنت گڑا آ اے جار ءَ جت کن اخنت اے درست روس ءِ اُرش اَنت ابید دگہ چیز ءَ آ جنگ کت کن اَنت‘-

میان اُستمانی رھشوناں ریفرنڈم ءِ ایرجنی کتگ کہ چریانی تہ ءُ امریکی سروک جوبائیڈن، میان اُستمان ءِ سیکریٹری جنرل انتونیو گوٹیرس ءُ فرانسیسی سروک ایمانوئل میکخواں ھوار ھوار نیٹو، یورپی یونین ءُ یورپ ءُ رکینوک ءُ کمکی گل ھوار اَنت-

زانگ بہ بیت چار شمبے ءِ روچ ءَ روسی سروک پوتن ءَ اے جار جتگ ات کہ دگہ گیش سَے لک پوجی جنگ ءَ ھوار گیجگ بنت-

آئی ءَ گوشتگ ات کہ اگاں ’ روکپت ءِ جیڑاہ کنوک وتی زھرناکیں سلاھانی سر ءَ سرجھلی کنگ ءَ پیش دار اَنت گڑا ماسکو ھم وتی دراھیں سلاھاں تاکت ءِ گون ءَ کارمرد کنت ءُ اشی ءِ پسو ءَ دنت –

اگاں مئے ڈیھ ءِ سر ءَ ھترہ بیت آئی ءِ پروشت ءُ پروش ءِ جنگ ءِ آماچ بیت گڑا وتی مردمانی پھریزگ ءَ درستیں پھناتانی تکاں کارمرد کن ایں –