پاکستانی پوج بلوچستان ءِ تہ ءَ بے کساس ءَ کُشت ءُ کوش کنگ ءَ انت – ماما قدیر بلوچ

بلوچستان ءِ بنجاھی شھر شال ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی بنجل ءَ چار ھزار ءُ ھپسد ءُ شست ءُ ھشت روچ سرجم بوتگ انت – مروچی چہ نوشکی ءَ امین اللہ بلوچ، علاوہ الدین بلوچ ءُ بی ایس او پجار ءِ جوائنٹ سیکرٹری ابرار بلوچ ءُ دگہ مردماں بنجل ءَ اتکگ ءُ دلپدردی دتشان اتگ –

ھمے وھد ءَ گل ءِ کمک سرکماش ماما قدیر بلوچ ءَ گوشتگ کہ جھد ءِ تہ ءَ فرد وتی شھیدی ءَ ادارہ جوڈ کن انت ءُ سرگوست ءُ راجدوستی ءِ جزبگاں وتی پشت ءَ یل کن انت ءُ رو انت –

آئی ءِ گوشگ ات کہ مارا بازیں سال ءِ بیت کہ وتی دوستیگیں مردمانی یل کنائینگے ھاتر ءَ پُرایمنیں جھد کنگ ءَ انت بلے پاکستانی پوج ھمک روچ مردماں آوار جنگ ءُ بیگواہ کنگ ءَ انت –

آئی ءِ گوشگ ات کہ راجی جھد ءَ پہ ھنر ھیلاں ھلاس کنگ ناممکن انت ریاست توپک ءِ زور ءَ چہ بلوچ باج برگ ءِ بدل ءَ سیاسی رویش وتیگی بہ کنت –

ماما قدیر بلوچ ءَ گوشتگ کہ اے وھدی بلوچستان ءَ زورانسری آوار جنی ءِ جیڑہ سک باز نگیگ بوان انت – درسیں سیاسی ءُ نودربرگلاں یکجاہ بوگ ءُ اے در انسانی امل ءِ بگیری ءَ جھد کنگی انت ءُ بیگواھیں مردمانی کھولانی ھمراہ داری کنگی انت –