بلوچستان ءِ بنجاھی شھر شال ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی ءَ چار ھزار ءُ ھپسدو ءُ شست ءُ ھپت روچ سرجم بوتگ انت – مروچی چہ نوشکی ءَ امیر محمد بلوچ، داد محمد بلوچ ءُ دگہ سیاسی ءُ چاگردی باسکاں بنجل ءَ اتکگ ءُ بیگواھیں مردمانی کھول ءِ گوم ءَ دلپدردی درشان اِتگ –
بنجل ءَ اتکگیں مردمانی میان ءَ تران کنان ءَ گل ءِ کمک سرکماش ماما قدیر بلوچ ءِ گوشگ ات کہ ھنچوش کہ شما گندگ ءَ ایت کہ زورانسری آوار جنگ بوتگیں مردمانی یل کنائینگے ھاتر ءَ برجاھیں جھد یکجاہ مھکم بوان انت ھمے درچ ءِ ھمراھی ءَ ریاست پاکستان ءِ زلم زوراکیانی تہ ءَ گیشی آیگ ءَ اِنت – چہ ھپتاد سالاں برجاھیں کبزہ بگیری ءَ توار چست کنوک ءُ جھد ءَ لوگ پہ لوگ ءَ سرکنوکیں ھزارانی کچ ءَ رھشون ءُ باسک آوار جنگ ءُ بیگواہ کنگ بوتگ انت بازینے شھید کنگ بوتگ انت ءُ ریاست ءِ اے درچ برجاہ انت ھزارانی کچ ءَ جھد ءِ ھیرواہ مروچی ھم ریاست ءِ زندانانی تہ ءَ بندیگ انت ءُ زوراکی سگگ انت –
ماما قدیر بلوچ ءَ گوشتگ کہ ھزاراں بلوچ باسکانی گس ماندارگ بوتگ انت لٹ ءُ پُل کنگ بوتگ انت زھگ ءُ زالبول کم شرپ کنگ بوتگ انت – وی بی ایم پی ءِ گور ءَ اے گپ ءِ گواہ ھست انت ءُ ریاست ءِ نیمگ ءَ اے زوراکیانی تہ ءَ ھچ کمی نہ اتکگ ءُ وتی کبزہ ءِ برجاہ دارگے ھاتر ءَ آ بلوچانی سلو جینو سائیڈ ءِ تہ ءَ گیشی کاریت اے زلم زوراکیانی گندگ ءَ پد ھم بلوچ ءُ رھشون ءُ باسکانی پاد نہ لرز انت –
ماما قدیر بلوچ ءَ گوشتگ کہ فردانی بدل ءَ گل ءُ ادارھانی مھکم کنگے زمہ داری بلوچ راج ءِ سر انت – ریاستی زلم زوراکیانی تہ ءَ ھمک روچ گیشی آیان انت ءُ اے کار زورگیرانی میان ءَ کسان انت بلے ھما کہ بلوچیت ءِ داواہ دار انت کہ پارلمنٹ ءِ تہ ءَ نشتگ انت یا ریاست ءِ زورگیری ءِ بھر انت آھاں پگر کنگی انت کہ پاکستان ءُ آئی ءِ پوج ءَ بلوچ ءِ ننگ ءُ ناموس ءَ ھچ کار نیست آ بس بلوچانی مال مڈیانی تلبگار انت –
ماما قدیر بلوچ ءَ گوشتگ کہ اے سپر ھمینچو دراجتر بیت انت ریاست ھمے وڑ بلوچ مات ءُ گھارانی ننگ ءُ ناموس ءَ لگتمال کنان کنت – مروچی بلوچ راج ءَ گوں دلیری ءَ اے پُرایمنیں جھد ھما جاہ ءَ آرتگ ءُ سر کتگ اشی ءِ واستا المی انت کہ ھر تک ءُ پھناتاں سیادی داروکیں مردم وتی ننگ ءُ ناموس ءُ بیگواھیں مردمانی ھاترءَ دژمن ءَ پجا بیاریت پرایمنیں جھد ءِ تہ ءَ وتی کرد ءَ پیلو بہ کنت ءُ دژمن ءِ ھُنر ھیلاں سرپد بہ بیت –