ڈالر ءِ نھاد ءِ گیش بیگ ءَ پاکستانی کلدار کپتگ ءُ دو سد ءُ چل ءَ سر بیتگ

گوستگیں بازیں وھداں پاکستانی کلدار روچ پہ روچ جھل کپان اِنت مروچی ڈالر ءِ نھاد ءِ برز بیگ ءَ پاکستانی کلدار اولی رند ءَ دو سد ءُ چل ءَ سر بیتگ-

پاکستانی کلدار ءِ کپگ یکشل ءَ برجاہ اِنت ڈیھی راجدپتر ءَ ڈیھ ءَ اولی رند ءَ امریکی یک ڈالرے پاکستان ءِ دو سد ءُ چل ءَ سر ءَ بیتگ –

ھمسنتی سرکار ءِ آیگ ءَ پد داں انگت ءَ پاکستانی کلدار ءَ پنجاہ ءُ ھشت کلدار کمی اتکگ، زرکاری زانتکارانی گوشگ اِنت دری بلانی گیشی ءُ ڈالر ءِ باپار ءِ سبب ءَ کلدار روچ پہ روچ جھلی ءِ دیمپان اِنت-

فاریکس ڈیلرز ءِ رد ءَ چار شمبے ءِ روچ ءَ کار ءُ بار ءِ بندانت ءَ انٹربینک ءَ یک ڈالرے ءِ نھاد ءَ برز بیگ ءَ پد دو سد ءُ چل ءَ برزتریں جاہ ءَ سر بیتگ-

کار ءُ بار ءِ باپار ءِ بندات ءَ کلدار ءِ جھل کپگ ءَ گندگ ءَ اَنت کہ اے یکشل ءَ برجاہ اَنت-

جنرل سیکرٹری ایکسچینچ کمپینیز آف پاکستان ظفر پراچہ ءِ گوشگ اِنت کلدار ءِ جھلی ءِ سبب ڈالر ءِ اسگلنگ ءُ امپورٹ بلانی گیشی اِنت –

آئی ءَ گوشتگ ’ سرکار ءَ لوٹ ایت اژدری ءَ کلدار ءِ گھتری ءَ گامگیج بہ زور ایت، اگاں انیگیں جاورھالاں ڈالر ڈیھ ءَ ڈن روگ ءَ دارگ نہ بیت گڑا آوکیں روچاں گیش مشکل بیت اِنت ‘-

زرکاری ءِ زانتکار سمیع اللہ طارق ءَ گوشتگ کہ کلدار ءِ گھتری ءِ واستا اژدری اِنت ایکسپورٹ گیش کنگ بہ بیت ءُ ھرچ ءُ درچ کم کنگ بہ بیت-

آئی ءَ گوشتگ ’ ڈیھ ےَ اے وھد ءَ دری بل گیش اَنت چریشی ءِ ڈیھ ءِ ھزانہ ءَ کلدار ءِ کمی اِنت ءُ چریشی ءَ کلدار روچ پہ روچ جھلی ءِ دیم ءَ گندگ بیگ ءَ اِنت‘-

آئی ءَ گوشتگ ’سرکار ءَ اژدری ءِ اِنت آ کلدار ءِ گھتری ءِ واستا جوانیں گامگیج بہ زور ایت ءُ اشی ءَ ھچ دیر مہ کنت‘-