بلوچستان: دگ ءِ وئیل دگہ وئیلاں چار مردم بیران، ھژدہ ٹپی

بلوچستان ءِ جتا جتائیں وئیلاں چار شمبے ءِ روچ ءَ پیش اتکگیں دگ ءِ وئیل ءَ دگہ ناوشیں وئیلاں چار مردم بیران ءُ ھژدہ ٹپی بیتگ اَنت-

وئیل پنجگور، سوراب، ماشکیل ءُ گوادر ءَ پیش اتکگ اَنت – پنجگور ءَ سر بیتگیں ھالانی رد ءَ دزناپ ءَ سلاہ بندیں مردماں تیرگواری کرتگ ءُ دَھمی تبک ءِ نودربر مشتبہ ء پرویز نامیں ورنایے کشتگ-

دو نیمگ ءَ سوراب ءَ مساپر بریں کوچ کپتگ ءُ پانزدہ مردم زدگ بیتگ اَنت، وئیل کوچ ءِ ڈرائیور ءِ واب کپگ ءِ سبب ءَ پیش اتکگ –

دگہ یک وئیلے ماشکیل ءَ پیش اتکگ کہ اود ءَ منگوچر ءَ اجتماع ءَ روکہں گاڑی وئیل ءِ آماچ بیتگ دو مردم بیران ءُ سَے زدگ بیتگ اَنت –

جیونی ءَ دیم پہ کراچی ءَ روکیں کرولا گاڑی مکران ءِ مزن شھدگ ءَ شتنگی ءِ ھند ءَ وئیل ءِ آماچ بیتگ-

وئیل ءَ شرافی گوٹھ کراچی ءِ جھمنند مھمد علی ء مھمد رھیم ھما جاہ ءَ بیران بیتگ ءُ جیونی ءِ جھمنند مبین زدگ بیتگ ءُ آ زدگیں جاوراں آر ایچ سی پسنی ءَ برگ بیتگ –