سبی: کماشیں مردمے ءَ وتکشی کتگ

بلوچستان ءِ دمگ سبی ءَ کماشیں مردمے ءَ وتکشی کتگ –

وتکشی کنوکیں مردم ءِ پجار ھمزہ ھان ء سیفل خان ءِ نام ءَ زانگ بیتگ کہ آئی ءِ اُمر شست سال گوشگ اِنت-

دمگی مردمانی وتکشی ءِ وئیل لوگ ءَ چہ ڈن ءَ جنگل ءَ پیش اتکگ کہ اود ءَ آئی ءَ ساد گُٹ ءَ کتگ ءُ وتی ساہ گپتگ اَنت-

لاش پوسٹ مارٹم ءِ واستا سول ھسپتال سبی ءَ برگ بیتگ، وئیل ءِ بارو ءَ دگہ سرپدی نہ بیتگ اَنت-

زانگ بہ بیت بلوچستان ءَ وتکشیانی وئیل روچ پہ روچ گیش بیان اَنت – گوستگیں ھپتگ ءَ وتکشی ءِ اے چارُمی وئیل اِنت – اشی ءَ پیسر نوشکی ءَ مشتاق ءُ سبی ءَ سنجے ءَ ھمے وڑ پنجگور ءَ سعود نامیں مردمے ءَ وتکشی کتگ ات-

بلوچستان ءَ گیش بیتگیں وئیلانی پشدر ءَ تربت یونیورسٹی ءَ گوستگیں روچ ءَ یک نیادے برجم دارگ بیتگ ات اود ءَ ڈپریشن ءِ سبب ءَ وتکشی ءِ گیش بیتگیں پدردی اَنت – ڈپریشن ءِ گر ءُ دار ءِ واستا جتا جتائیں لیکہ پیش کنگ بیتگ اَنت-