روکپتی بلوچستان ءَ پانزدہ سالی ئیں جنکے ءِ گون ءَ پولیس ءِ مزنیں آفیسرے ءِ سلکاری بھتام

روکپتی بلوچستان ءِ تیابدپی شھر چھبار ءَ ایرانی پولیس ءِ آفیسر ءِ سر ءَ بھتام جنگ بیتگ کہ آئی ءَ پانزدہ سالیگیں جنکے ءِ گون ءَ زورانسری سلکاری کرتگ-

ھالانی تہ ءَ گوشگ بیتگ کہ چھبار پولیس ءِ سروک ابراھیم کوچکزائی ءَ یک پانزدہ سالیگیں جنکے ءِ گون ءَ زورانسری سلکاری کتگ-

ھالانی تہ ءَ گیش گوشگ بیتگ کہ چھبار ءِ ھند صدیق زئی میتگ ءَ یک زالبولے ناشناساں کارچ جتگ ءُ کشتگ کہ آئی ءِ نام طاھرہ آھون ء نورمھمد ءِ نام ءَ زانگ بیتگ ءُ چرے کوش ءِ پژدر ءَ پولیس ءَ دمگ ءَ پٹ ءُ پول کرتگ ءُ یک جنکے ھمے بھتام ءَ لوٹائینتگ پہ پٹ ءُ پول ءَ –

ھمے میان ءَ پولیس ءَ کشگ بیتگیں جنک ءِ ھمساھگیں جنکے گپتگ ءُ برتگ ءُ اود ءَ داں بازیں اداراں دارگ ءَ پد یلو کرتگ-

جنک ءَ یل بیگ ءَ پد وتی لوگ ءِ مردمانی گور ءَ گوشتگ کہ من ءَ اود ءَ برتگ اش اود ءَ منی گُد کش اتگ ءُ منی گون ءَ سلکاری کرتگ ات کہ سلکاری کنوک ءِ نام ابراھیم کوچکزئی کہ چھبار پولیس ءِ یک مزنیں آفیسرے-

زانگ بہ بیت گوست ءَ ایرانشھر ءِ جمعہ امام مسیت ءِ مولوی مھمد طیب ملازئی ءَ ھم اے بھتام جتگ ات کہ چل ءُ یک جنک ایرانی پولیس ءِ دست ءِ چیر ءَ اَنت کہ آیانی گون ءَ زوراکی بیگ ءَ اِنت-

ایرانی پولیس ءُ دگہ انتزامیہ ءِ نیمگ ءَ چوشیں وئیلانی بارو ءَ راستی پدر کنگ نہ بیتگ اَنت بلے لس مھلوک ءِ بھتاماں اے وئیل بیتگ اَنت-

دومی نیمگ ءَ پولیس ءِ آفیسر ابراھیم کوچکزئی ءَ اسرمندیں کھول بیھار داتگ اَنت-

کھول ءِ گوشگ اِنت کہ ابراھیم کوچکزئی ءَ گوشتگ کہ اگاں شما وتی گپ واتر نہ زرت اَنت گڑا شمئے ھلاپ ءَ کوش ءِ بھتام جنگ بیت اِنت ءُ شمئے ھلاپ ءَ بیڑ برگ بیت اِنت-

دومی نیمگ ءَ چھبار ءِ نمائندگ معین الدین سعیدی ءَ را لس مھلوک ءَ گوشتگ اے آفیسر ءِ ھلاپ ءَ گامگیج بہ زور ءُ آسرمندیں کھول ءَ انساپ دیگ بہ بیت اِنت-