منی زھگ ءُ آئی ءِ سنگت یل کنگ بہ بنت – بیگواھیں کبیر بلوچ ءِ مات

زورانسری آوار جنی ءَ پد بیگواہ بوتگیں کبیر بلوچ ءِ مات ءَ گوشتگ کہ منی زھگ کبیر بلوچ ءُ آئی سنگت مشتاق بلوچ ءُ عطاء اللہ بلوچ ءَ چار سال سرجم بوگ ءَ انت کہ بیگواہ انت کہ انگت یل کنگ نہ بوتگ انت –

آئی ءَ وتی زھگ کبیر بلوچ، مشتاق بلوچ ءُ عطاء اللہ بلوچ ءَ ھوار درسیں بیگواھیں مردمانی یل کنگ ءِ لوٹ کتگ ءُ گوشتگ کہ ھچ سرکار بیگواھیں مردمانی یل کنائینگ ءَ سنجیدگ نہ بوتگ – ھر سرکار ءَ اے انسانی جیڑوے دراج کش دیگے ھاتر ءَ بس بے واکیں کمیشن ءُ کمیٹی اڈ داتگ انت جیڑو ءِ سرگوز کنگے کوشست کتگ ، چدوپیش عدالتی انکوائری کمیٹی ھم اڈ دیگ بوتگ –

آئی ءَ گوشتگ کہ جسٹس جاوید اقبال ءِ چیردستی ءَ بیگواھیں مردمانی یل کنائینگے ھاتر ءَ کمیٹی ھم جوڈ کنگ بوتگ بلے کرد ھاک پہ جس، چہ سرکاری خزانہ ءَ آئی ءَ کروڈانی ھساب ءَ زر ھم اے درگت ءَ دیگ بوتگ بلے آئی بیگواھیں مردمانی یل کنائینگے بدل ءَ آئی ءَ بیگواھیں مردمانی کھول ترسینتگ ءُ بیھار دیگے جھد کتگ تانکہ بیگواھیں مردمانی کھول وتی دوستیگیں مردمانی یل کنائینگے لوٹ دزکش بہ بنت –