شال: وی بی ایم پی ءِ زھرشانی بنجل ءَ چار ھزار ءُ شش سد ءُ ھپتاد ءُ دو روچ سرجم بوتگ انت

بلوچستان ءِ بنجاھی شھر شال ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی بنجل ءَ مروچی چار ھزار ءُ شش سد ءُ ھپتاد ءُ دو روچ سرجم بوتگ انت – مروچی حسن مینگل ایڈوکیٹ، رضا ایڈوکیٹ ءَ ھوار ھر تکاں سیادی داروکیں مردماں بنجل ءَ اتکگ ءُ دلپدردی درشان اِتگ –

ھمے وھد ءَ وی بی ایم پی ءِ کمک سرکماش ماما قدیر بلوچ ءَ گوشتگ کہ مئے گل ءَ ھمک وھد ءَ بلوچستان ءِ تہ ءَ ریاستی زلم ءُ زوراکی، بلوچ ءِ چکچینی ءُ زورانسری آوار جنیانی درگت ءَ ملک ءُ درملکاں توار چست کتگ، یو این ءُ آئی جھلی ادارھانی سر ءَ انسانی ھکانی لگتمانی درگت ءَ نبشتہ کتگ ءُ دیم داتگ بلے ریاستی زلم زوراکیانی گر ءُ دار ءَ ھچ وڈیں کمی نہ اتکگ –

آئی ءَ گوشتگ کہ وھدیکہ وفاقی سرکار ءُ زورانسری آوار درگت ءَ جوڈ بوتگیں کمیٹی ملکی ادارھاں ھوار نہ کن انت ءُ چہ آھاں جست نہ گر انت گڈا اے وڈ زورانسری آوار جنی ءِ درچ ھلاس نہ بیت اِنت – “ملکی ادارھانی دست مان نہ انت ” وفاقی ادارھانی اے درشان ءَ پدر بیت کہ آ سنجیدگ نہ انت – مئے گور ءَ زورانسری آوار جنی ءِ ثبوت آن دی ریکارڈ ھست انت کہ مردمانی زورانسری آوار جنی ءَ پاکستان ءِ آرمی ءُ چیریں ادارھانی دست تچکی ءَ مان انت – وفاقی تبک ءَ اے وڈیں بازیں کیس ءِ آن دی ریکارڈ ھست انت کہ آمیدگس ءَ ھمے ادارھ گوشتگ انت کہ مردم یل کنگ بہ بنت –

آئی ءَ دیمتر ءَ گوشتگ کہ زورانسری آوارجنیانی درگت ءَ ملک ءِ ادارہ ءُ آھانی سروکاں بیگواھیں مردمانی کھول ءُ آمیدگس ءَ پیش بوگی انت ءُ جوابدہ بوگی انت –