کراچی پولیس ءَ پاکستان ءِ پروشی ءِ شاتکامی ءِ پژدر ءِ بھتام ءَ بازیں اوگانی شھری دزگیر کتگ انت-
دزگیر کنگ بیتگیں مردمانی بگیری ءَ سوراب گوٹھ ءِ تھانہ ءَ ارزی نبشتگ کنگ بیتگ – ارزی متن ءِ رد ءَ سوراب گوٹھ ءِ نزیک ءَ گشت ءَ بیتگاں گڑا ھمے وھد ءَ پولیس ءَ سِی ءَ گیش مردم شاتکامی ءَ دیستگ اَنت ءُ ھمے وھد ءَ پجار شناسی ءَ پد درست اوگانی بیتگ اَنت ءُ گیر کانونی رنگ ءَ پاکستان ءَ پتر تگ اَنت-
ڈی ایس پی سھیل فیض ءَ رسانکدراں گپ کنان ءَ گوشتگ کراچی پولیس ءَ کرکٹ میچ ءَ پاکستان ءِ پروشگ ورگ ءَ پد شاتکامی کنوکیں بیست ءُ شش مردم دزگیر کتگ اَنت کہ اے درست اوگانی شھری اَنت ءُ گیرکانونی رنگ ءَ سیمسر ءَ گوستگ اَنت ءَ پاکستان ءَ اتکگ اَنت-
پولیس ءَ بھتام جتگ ءُ گوشتگ گوستگیں روچ ءَ پاکستان ءُ سریلنکا ءِ میان ءَ دبئی ءَ بیوکیں ایشیا کرکٹ کپ ءَ پاکستان ءِ پروش ورگ ءَ اوگانی شھریاں کراچی ءِ دمگ سوراب گوٹھ ءِ تہ ءَ شاتکامی کتگ ھمے وھد ءَ شھریاں اشانی شنگ ءُ شانگ کنگ ءِ جھد کتگ گڑا ھمے وھد ءَ زورانسری کنگ ءَ یک مردمے ءِ سر ءَ زورانسری پاکستان مردہ باد ءِ اوگام گوشائینتگ-
پولیس ءَ گپتگیں مردمانی ھلاپ ءَ فارن ایکٹ ءِ تک ءَ ارزی نبشتگ کتگ ءُ کیس ءِ بارو ءَ گیش پٹ ءُ پول کنگ ءَ اِنت-
زانگ بہ بیت پاکستان ءِ پروش ورگ ءِ بھتام ءَ شاتکامی ءَ گوستگیں روچ ءَ شال ءِ پولیس ءَ ھم دو درزن ءِ کچ ءَ بلوچ نودربر دزگیر کتگ ءُ تھانہ ءَ برتگ ات اَنت-
بلوچ نودربرانی رد ءَ آ کرکٹ میچ ءِ چارگ ءَ یکجاھے ءَ مچ بیتگ اَنت ءُ پولیس ءَ ناگتی بیڑ برتگ ءُ درزانء کچ ءَ نودربر گپتگ ءُ تھانہ ءَ برتگ اَنت ءُ پد ءَ پولیس ءَ نودربر بیھار داتگ ءُ آوکیں وھداں پاکستان ءِ پروشی ءَ شاتکامی نہ کن ایں-